ரஜினிகாந்த் நடிப்பில் வெளியாகியுள்ள ‘ஜெயிலர் 2’ திரைப்படத்தில் பாலிவுட் நடிகர் ஹிருத்திக் ரோஷன் சிறப்புத் தோற்றத்தில் நடித்துள்ளார். சில நிமிடங்களே திரையில் தோன்றும் அவருக்கு ரூ.25 கோடி வரை ஊதியம் வழங்கப்பட்டுள்ளதாகத் தகவல்கள் வெளியாகியுள்ளன. ரஜினிகாந்த் - நெல்சன் திலீப்குமார் கூட்டணியில் உருவான ‘ஜெயிலர்’ திரைப்படம் 2023-ம் ஆண்டு திரைக்கு வந்தது. சன் பிக்சர்ஸ் தயாரித்த இந்தப் படம் ரூ.600 கோடிக்கும் அதிகமாக வசூலித்து பெரும் வெற்றியைப் பதிவு செய்தது. இதன் தொடர்ச்சியாக உருவான ‘ஜெயிலர் 2’ கடந்த 15-ம் தேதி வெளியாகி, ரசிகர்களின் வரவேற்புடன் வசூலிலும் கவனம் பெற்று வருகிறது. முதல் பாகத்தில் நடித்த மோகன்லால், சிவராஜ்குமார், ரம்யா கிருஷ்ணன், மிர்ணா மேனன், யோகிபாபு உள்ளிட்ட பலரும் இரண்டாம் பாகத்திலும் தங்களது கதாபாத்திரங்களில் நடித்துள்ளனர். இவர்களுடன் எஸ்.ஜே.சூர்யா, ஹிருத்திக் ரோஷன், மிதுன் சக்கரவர்த்தி, விஜய் சேதுபதி, நமோ நாராயணா உள்ளிட்ட நடிகர்களும் இணைந்துள்ளனர். படத்திற்கு அனிருத் இசையமைத்துள்ளார். திரைப்படத்தின் முதல் பகுதியில் வரும் நகைச்சுவைக் காட்சிகளும், பிற்பகுதியில் இடம்பெறும் சண்டைக் காட்சிகள் மற்றும் உணர்ச்சிகரமான தருணங்களும் பார்வையாளர்களைக் கவர்ந்துள்ளதாகக் கூறப்படுகிறது.
Advertisement
அனிருத்தின் பின்னணி இசையும் படத்தின் முக்கிய அம்சமாக ரசிகர்களால் பேசப்படுகிறது. இதற்கிடையில், ஹிருத்திக் ரோஷனின் சிறப்புத் தோற்றம் படத்தின் மீதான எதிர்பார்ப்பை மேலும் அதிகரித்துள்ளது. அவர் சுமார் 5 முதல் 7 நிமிடங்கள் மட்டுமே திரையில் தோன்றுவதாகக் கூறப்படும் நிலையில், இந்தச் சிறிய கதாபாத்திரத்திற்காக ரூ.25 கோடி வரை சம்பளம் பெற்றிருக்கலாம் எனத் தகவல்கள் தெரிவிக்கின்றன. இருப்பினும், இந்த ஊதிய விவரம் அதிகாரப்பூர்வமாக உறுதிப்படுத்தப்படவில்லை. ரஜினிகாந்துக்கும் ஹிருத்திக் ரோஷனுக்கும் இடையிலான பழைய திரைப் பிணைப்பும் இந்தப் படத்தின் மீதான ஆர்வத்துக்குக் காரணமாகியுள்ளது. 1986-ம் ஆண்டு வெளியான ‘பகவான் தாதா’ இந்திப் படத்தில், அப்போது 12 வயது சிறுவனாக இருந்த ஹிருத்திக் ரோஷன், ரஜினிகாந்துடன் நடித்திருந்தார். சுமார் நான்கு தசாப்தங்களுக்குப் பிறகு இருவரும் மீண்டும் ஒரே படத்தில் இணைந்திருப்பது ரசிகர்களின் கவனத்தை ஈர்த்துள்ளது.
