ஜிஎஸ்எல்வி-எப்17 ராக்கெட் வெற்றிகரமாக ஏவப்பட்டது: இஸ்ரோ சாதனைக்கு பிரதமர் மோடி பாராட்டு

இந்திய விண்வெளி ஆராய்ச்சி நிறுவனமான இஸ்ரோ, ‘ஜூசாட்-1ஏ’ என அழைக்கப்படும் ‘இ.ஓ.எஸ்.-5’ பூமி கண்காணிப்பு செயற்கைக்கோளை ஜிஎஸ்எல்வி-எப்17 ராக்கெட் மூலம் விண்ணில் செலுத்தியது.கவுண்ட்டவுன் நிறைவடைந்ததைத் தொடர்ந்து, வெள்ளிக்கிழமை அதிகாலை 2.55 மணியளவில் ஆந்திரப் பிரதேசம் ஸ்ரீஹரிகோட்டாவில் உள்ள சதீஷ் தவான் விண்வெளி ஆய்வு மையத்தின் 2-வது ஏவுதளத்தில் இருந்து ஜிஎஸ்எல்வி-எப்17 ராக்கெட் வெற்றிகரமாக விண்ணில் புறப்பட்டது.ஏவப்பட்ட சுமார் 18 நிமிடங்களுக்குப் பிறகு, ‘இ.ஓ.எஸ்.-5’ செயற்கைக்கோள் திட்டமிட்ட சுற்றுப்பாதையில் வெற்றிகரமாக நிலைநிறுத்தப்பட்டது. பூமியில் இருந்து சுமார் 36 ஆயிரம் கிலோமீட்டர் உயரத்தில் உள்ள புவிநிலை சுற்றுவட்டப்பாதையில் செயற்கைக்கோள் நிலைநிறுத்தப்பட்டதைத் தொடர்ந்து, இஸ்ரோ விஞ்ஞானிகள் மகிழ்ச்சியுடன் இந்த வெற்றியைக் கொண்டாடினர்.இந்த சாதனை குறித்து பிரதமர் நரேந்திர மோடி தனது எக்ஸ் தளத்தில் வெளியிட்ட பதிவில், இஸ்ரோவின் மற்றொரு முக்கியமான சாதனை இது என்றும், நாட்டுக்கு பெருமை சேர்க்கும் தருணம் என்றும் பாராட்டியுள்ளார்.புவி ஒத்திசைவு சுற்றுப்பாதையில் இருந்து இந்தியாவின் முதல் படமெடுக்கும் செயற்கைக்கோளான ‘இ.ஓ.எஸ்.-5’-ஐ சுமந்து சென்ற ஜிஎஸ்எல்வி-எப்17 ராக்கெட்டின் வெற்றிகரமான ஏவுதல், இந்திய விண்வெளித் துறையின் திறன், புதுமை மற்றும் வளர்ச்சியை வெளிப்படுத்துவதாகவும் பிரதமர் குறிப்பிட்டுள்ளார்.மேலும், இஸ்ரோவுக்கும் இந்திய தொழில்துறைக்கும் இடையே உருவாகி வரும் ஒத்துழைப்பு, நாட்டின் விண்வெளித் திட்டத்துக்கு புதிய வலிமையையும் விரிவையும் அளிப்பதுடன், ஒட்டுமொத்த விண்வெளிச் சூழலிலும் இந்தியாவின் திறன்களை மேலும் அதிகரிக்க உதவுவதாகவும் அவர் தெரிவித்துள்ளார்.