அரசு வேலை வழங்கக் கோரி சைகை மொழியில் கோரிக்கை விடுத்த மாற்றுத்திறனாளி இளைஞருக்கு, ஒரே நாளில் பணி நியமன ஆணையை வழங்கி நடவடிக்கை எடுத்துள்ளார் தமிழக முதல்-அமைச்சர் விஜய். சென்னை திருவொற்றியூரைச் சேர்ந்த தினேஷ் என்ற மாற்றுத்திறனாளி இளைஞர், நேற்று கிண்டியில் நடைபெற்ற நிகழ்ச்சியில் முதல்-அமைச்சர் விஜய்யை நேரில் சந்தித்தார். அப்போது, சைகை மொழி வாயிலாகத் தனக்கு அரசு வேலை வழங்க உதவுமாறு கோரிக்கை விடுத்து மனு அளித்தார். தினேஷின் மனுவைப் பெற்றுக்கொண்ட முதல்-அமைச்சர் விஜய், அவரது கோரிக்கை தொடர்பாக உரிய நடவடிக்கை எடுக்க அதிகாரிகளுக்கு அறிவுறுத்தினார்.
Advertisement
இதையடுத்து, அதிகாரிகள் அவரது கோரிக்கையைப் பரிசீலித்து, அரசு வேலை வழங்குவதற்கான நடவடிக்கைகளை விரைந்து மேற்கொண்டனர். இதன் தொடர்ச்சியாக, திருவொற்றியூர் அரசு தொழிற்பயிற்சி நிலையத்தில் பணிமனை உதவியாளர் பணிக்கான நியமன ஆணை தயாரிக்கப்பட்டது. அந்த ஆணையை முதல்-அமைச்சர் விஜய், தினேஷிடம் நேரில் வழங்கினார். இதன் மூலம், அரசு வேலை கோரி மனு அளித்த மாற்றுத்திறனாளி இளைஞருக்கு ஒரே நாளில் பணி நியமன ஆணை கிடைத்துள்ளது. அவரது கோரிக்கையைப் பரிசீலித்து விரைவாக நடவடிக்கை எடுக்கப்பட்டதும், முதல்-அமைச்சரே நேரில் நியமன ஆணையை வழங்கியதும் கவனத்தை ஈர்த்துள்ளது.
