இந்திய மகளிர் கிரிக்கெட் அணியின் முக்கிய பேட்டரான ஜெமிமா ரோட்ரிக்ஸ், காயத்திலிருந்து குணமடைந்து மீண்டும் கிரிக்கெட் விளையாடத் தயாராகியுள்ளார். இங்கிலாந்தில் நடைபெற்ற ‘தி ஹண்ட்ரட்’ கிரிக்கெட் தொடரில் பங்கேற்றபோது, கடந்த ஆகஸ்ட் 3ஆம் தேதி அவருக்கு தசைப் பகுதியில் காயம் ஏற்பட்டது. இதனால் ஆசியக் கோப்பை, ஆசிய விளையாட்டுப் போட்டிகள் மற்றும் ஜிம்பாப்வே அணிக்கு எதிரான கிரிக்கெட் தொடர் உள்ளிட்ட முக்கியப் போட்டிகளில் அவரால் விளையாட முடியவில்லை. காயத்தில் இருந்து மீண்டு பழைய உடற்தகுதியைப் பெறுவதற்காக கடந்த மூன்று மாதங்களாக ஜெமிமா தொடர்ந்து மறுவாழ்வுப் பயிற்சிகளை மேற்கொண்டு வந்தார். மருத்துவக் குழுவின் வழிகாட்டுதலின்படி பல்வேறு உடற்பயிற்சிகளையும் செய்து வந்த அவர், தற்போது முழுமையாகக் குணமடைந்து உடற்தகுதி பெற்றுள்ளார்.
Advertisement
இதுகுறித்த தகவலை தனது இன்ஸ்டாகிராம் பக்கத்தில் பகிர்ந்துள்ள ஜெமிமா, மீண்டும் கிரிக்கெட் மைதானத்தில் களமிறங்குவதற்கு ஆவலாக இருப்பதாக மகிழ்ச்சியுடன் தெரிவித்துள்ளார். ஜெமிமா மீண்டும் உடற்தகுதி பெற்றிருப்பது இந்திய மகளிர் கிரிக்கெட் அணிக்கு உற்சாகத்தை அளித்துள்ளது. அவரது அதிரடி பேட்டிங், சூழலுக்கு ஏற்ப நிதானமாக விளையாடும் திறன் மற்றும் சிறப்பான களத்தடுப்பு ஆகியவை அணிக்கு கூடுதல் வலுசேர்க்கும். மூன்று மாத காலப் போராட்டத்துக்குப் பிறகு காயத்திலிருந்து மீண்டுள்ள ஜெமிமா, மீண்டும் தனது வழக்கமான ஆட்டத்திறனை வெளிப்படுத்துவாரா என்ற எதிர்பார்ப்பு கிரிக்கெட் ரசிகர்கள் மத்தியில் உருவாகியுள்ளது.
