தமிழக அரசு ஊழியர்கள் மற்றும் ஆசிரியர்களுக்கு 3 சதவீதம் அகவிலைப்படி உயர்வு வழங்கப்படும் என முதல்-அமைச்சர் ச.ஜோசப் விஜய் அறிவித்துள்ளார். இதன்படி, தற்போது 60 சதவீதமாக உள்ள அகவிலைப்படி, வரும் ஜூலை 1-ம் தேதி முதல் 63 சதவீதமாக உயர்த்தி வழங்கப்பட உள்ளது. இதுதொடர்பாக தமிழக அரசு வெளியிட்டுள்ள செய்திக்குறிப்பில் கூறியிருப்பதாவது: முதல்-அமைச்சர் ச.ஜோசப் விஜய் தலைமையிலான தமிழக அரசு, மக்களின் நலனுக்காக பல்வேறு திட்டங்களை உருவாக்கி செயல்படுத்தி வருகிறது. இத்தகைய திட்டங்களைத் தயாரிப்பதிலும், அவற்றைச் சிறப்பாக நடைமுறைப்படுத்துவதிலும் அரசு அலுவலர்கள் மற்றும் ஆசிரியர்களின் பங்களிப்பு முக்கியமானதாக உள்ளது. அவர்களின் நலனைக் கருத்தில் கொண்டு, மத்திய அரசு ஊழியர்களுக்கான அகவிலைப்படி 2026 ஜூலை 1-ம் தேதி முதல் 60 சதவீதத்திலிருந்து 63 சதவீதமாக உயர்த்தப்பட்டுள்ளது. இதனைத் தொடர்ந்து, தமிழக அரசு ஊழியர்கள் மற்றும் ஆசிரியர்களுக்கும் அதே அளவில் அகவிலைப்படியை உயர்த்தி வழங்க முதல்-அமைச்சர் உத்தரவிட்டுள்ளார்.
Advertisement
இதனால், மாநில அரசு ஊழியர்கள் மற்றும் ஆசிரியர்களுக்கான அகவிலைப்படி 3 சதவீதம் அதிகரித்து, 60 சதவீதத்திலிருந்து 63 சதவீதமாக வழங்கப்படும். இந்த உயர்வின் மூலம் சுமார் 16 லட்சம் அரசு ஊழியர்கள், ஆசிரியர்கள், ஓய்வூதியதாரர்கள் மற்றும் குடும்ப ஓய்வூதியதாரர்கள் பயனடைவார்கள். இந்த அகவிலைப்படி உயர்வைச் செயல்படுத்துவதன் மூலம் அரசுக்கு ஆண்டுக்கு கூடுதலாக ரூ.1,858 கோடி செலவாகும். பயனாளிகளின் நலனைக் கருத்தில் கொண்டு, இதற்குத் தேவையான கூடுதல் நிதியை அரசு ஒதுக்கீடு செய்ய உள்ளது. அரசின் இந்த அறிவிப்பு, அரசு ஊழியர்கள், ஆசிரியர்கள் மற்றும் ஓய்வூதியதாரர்கள் உள்ளிட்டோர் வரவிருக்கும் தீபாவளிப் பண்டிகையை மகிழ்ச்சியுடன் கொண்டாட உதவும் என்றும் அந்தச் செய்திக்குறிப்பில் தெரிவிக்கப்பட்டுள்ளது.
