வெளிநாடுகளுக்கு ஏற்றுமதியாகும் வேப்பமுத்துகள்..!

நெல்லை மாவட்டம் இட்டமொழி பகுதியில் வேப்பமுத்து சேகரிக்கும் பணியில் பெண்கள், சிறுவர்-சிறுமிகள் ஆர்வத்துடன் ஈடுபட்டு வருகின்றனர். அவர்கள் சேகரிக்கும் வேப்பமுத்துகளை வியாபாரிகள் நல்ல விலைக்கு வாங்கி, வெளிநாடுகளுக்கு ஏற்றுமதி செய்து வருகின்றனர்.மருத்துவ குணங்கள் கொண்ட வேப்பமரத்தின் பல்வேறு பகுதிகளும் மக்களுக்கு பயனளிக்கின்றன. தமிழகத்தின் பல பகுதிகளிலும் வேப்ப மரங்கள் பரவலாக காணப்படுகின்றன. தற்போது வேப்ப மரங்களில் இருந்து உதிரும் பழங்களை சேகரித்து, அதிலிருந்து விதைகளான வேப்பமுத்துகளை தனியாக பிரித்து காயவைத்து விற்பனை செய்யும் பணி நடைபெற்று வருகிறது.இட்டமொழி பகுதியில் பல பெண்களும், சிறுவர்-சிறுமிகளும் தங்களது ஓய்வு நேரத்தில் வேப்பமுத்துகளை சேகரித்து விற்பனை செய்கின்றனர். ஒரு கிலோ வேப்பமுத்து ரூ.65 வரை வியாபாரிகளால் கொள்முதல் செய்யப்படுகிறது. பின்னர் அவை இட்டமொழியில் உள்ள மொத்த வியாபாரிகளிடம் விற்பனை செய்யப்படுகின்றன.அங்கிருந்து வேப்பமுத்துகள் மூட்டைகளில் நெல்லை, கோவில்பட்டி பகுதிகளுக்கு அனுப்பப்படுகின்றன. அங்கிருந்து அவை கன்டெய்னர்களில் ஏற்றப்பட்டு தூத்துக்குடி துறைமுகம் வழியாக அமெரிக்கா, இங்கிலாந்து, கனடா, ஜப்பான், தென்கொரியா, பிரேசில், இத்தாலி உள்ளிட்ட நாடுகளுக்கு ஏற்றுமதி செய்யப்படுகின்றன.வேப்பமுத்துகளை கொள்முதல் செய்யும் தனியார் நிறுவனங்கள், அவற்றை உடைத்து மேல்தோலை நீக்குகின்றன. பின்னர் விதைகளில் உள்ள பருப்பை எந்திரத்தின் மூலம் பிழிந்து வேப்ப எண்ணெய் தயாரிக்கின்றனர். மருந்து நிறுவனங்கள் வேப்ப எண்ணெயை அதிக விலைக்கு வாங்குவதால், வேப்பமுத்துகளுக்கான தேவை அதிகரித்து வருகிறது.இதுகுறித்து வியாபாரி ஒருவர் கூறுகையில், தற்போது வேப்பமுத்து சீசன் தொடங்கியுள்ளதாக தெரிவித்தார். இட்டமொழியில் இருந்து தினமும் சுமார் 100 வியாபாரிகள் பல்வேறு பகுதிகளுக்குச் சென்று வேப்பமுத்துகளை கொள்முதல் செய்து வருகின்றனர். அந்தந்த ஊர்களில் வயதான பெண்கள், பெண்கள் உள்ளிட்டோர் அதிகளவில் வேப்பமுத்துகளை சேகரிக்கின்றனர். பள்ளி மாணவ-மாணவிகளும் விடுமுறை நாட்களில் இந்தப் பணியில் ஈடுபடுகின்றனர்.வெளிநாடுகளில் உள்ள மருந்து நிறுவனங்கள் வேப்பமுத்துகளை அதிக விலைக்கு வாங்குவதால், அவற்றை சேகரிப்பவர்களுக்கும் கூடுதல் வருமானம் கிடைத்து வருகிறது. சிலர் அதிகளவில் வேப்பமுத்துகளை சேகரித்து, இடைத்தரகர்களைத் தவிர்த்து நேரடியாக இட்டமொழிக்கு கொண்டு வந்து விற்பனை செய்கின்றனர்.இட்டமொழியில் கொள்முதல் செய்யப்படும் வேப்பமுத்துகள் நெல்லை, கோவில்பட்டி பகுதிகளில் உள்ள குடோன்களுக்கு கொண்டு செல்லப்பட்டு பக்குவப்படுத்தப்படுகின்றன. பின்னர் அவை கன்டெய்னர்களில் ஏற்றப்பட்டு வெளிநாடுகளுக்கு அனுப்பப்படுகின்றன.வெளிநாடுகளில் உள்ள மருந்து நிறுவனங்கள் வேப்பமுத்துகளை வாங்கி பல்வேறு மருத்துவப் பொருட்களை தயாரிக்கின்றன. மேலும், அழகுசாதனப் பொருட்கள், இயற்கை பூச்சிவிரட்டி மற்றும் உரம் தயாரிப்பதற்கும், இயற்கை வேளாண்மைக்கும் வேப்பமுத்துகள் பயன்படுத்தப்படுகின்றன.