தமிழகத்தில் மஞ்சள் விலை இதுவரை இல்லாத அளவுக்கு உயர்ந்து புதிய உச்சத்தை எட்டியுள்ளது. கடந்த ஆண்டு ஒரு குவிண்டால் மஞ்சள் ரூ.20,000-க்கு விற்பனை செய்யப்பட்ட நிலையில், தற்போது அதன் விலை ரூ.23,000 வரை அதிகரித்துள்ளது. இந்த அதிரடி உயர்வு விவசாயிகள் மத்தியில் ஆச்சரியத்தையும், வணிகச் சந்தையில் பரபரப்பையும் ஏற்படுத்தியுள்ளது. கடந்த செப்டம்பர் மாதத்தில் ஒரு குவிண்டால் மஞ்சள் ரூ.15,000-க்கு விற்பனையானது. ஆனால், சில வாரங்களிலேயே விலை கணிசமாக உயர்ந்து தற்போது ரூ.23,000-ஐ எட்டியுள்ளது. மஞ்சள் உற்பத்தியில் முக்கியப் பங்கு வகிக்கும் தமிழகம் மற்றும் மகாராஷ்டிராவில் ஏற்பட்டுள்ள தண்ணீர் பற்றாக்குறையும், எதிர்பார்த்த அளவுக்குப் பருவமழை பெய்யாததும் இந்த விலை உயர்வுக்குக் காரணங்களாகக் கூறப்படுகின்றன.
Advertisement
மழை குறைந்ததால் நடப்பு ஆண்டில் மஞ்சள் சாகுபடி செய்யப்படும் நிலப்பரப்பும் வெகுவாகச் சுருங்கியுள்ளது. போதிய நீர் கிடைக்காததால் இந்தப் பருவத்தில் மஞ்சள் விளைச்சல் கடுமையாகப் பாதிக்கப்பட்டுள்ளது. இதனால், அடுத்த ஆண்டு சந்தைக்கு வரும் மஞ்சளின் அளவு கணிசமாகக் குறையக்கூடும் என்ற எதிர்பார்ப்பு நிலவுகிறது. எதிர்காலத்தில் மஞ்சள் வரத்து குறையும் என்ற அச்சத்தால், சந்தையில் கொள்முதல் போட்டி அதிகரித்து விலையும் வேகமாக உயர்ந்து வருகிறது. இதற்கிடையே, உள்நாட்டில் மஞ்சளுக்கான தேவை தொடர்ந்து அதிகரிப்பதுடன், ஏற்றுமதி ஆர்டர்களும் உயர்ந்து வருகின்றன. இந்தச் சூழலில், வரும் நாட்களிலும் மஞ்சள் விலை மேலும் அதிகரிக்க வாய்ப்புள்ளதாக வர்த்தக வட்டாரங்கள் தெரிவிக்கின்றன.
