சென்னை வண்டலூரில் அமைந்துள்ள அறிஞர் அண்ணா உயிரியல் பூங்காவில் விடுமுறை தினத்தை முன்னிட்டு இன்று காலை முதலே ஏராளமான பொதுமக்களும் சுற்றுலாப் பயணிகளும் தங்களது குடும்பத்தினருடன் வருகை தந்துள்ளனர். இதற்கிடையே, முன்னெச்சரிக்கை நடவடிக்கையாக பறவைகள் கூண்டுகள் அமைந்துள்ள பகுதிக்கு அருகில் சென்று பார்வையிட பூங்கா நிர்வாகம் தடை விதித்துள்ளது. கடந்த அக்டோபர் மாத தொடக்கத்தில் பூங்காவின் நீர்வாழ் பறவைகள் பிரிவில் அடுத்தடுத்து 7 பறவைகள் உயிரிழந்தன. அவற்றிடம் நடத்தப்பட்ட மருத்துவப் பரிசோதனையில் H5N1 வகை பறவைக் காய்ச்சல் பாதிப்பு இருப்பது உறுதி செய்யப்பட்டது. இதனைத் தொடர்ந்து பூங்கா தற்காலிகமாக மூடப்பட்டு, வளாகம் முழுவதும் கிருமிநாசினி தெளிக்கப்பட்டதுடன், உயிரி பாதுகாப்பு நடவடிக்கைகளும் தீவிரப்படுத்தப்பட்டன.
Advertisement
இதையடுத்து, அக்டோபர் 25-ம் தேதி முதல் பூங்கா மீண்டும் பொதுமக்களின் பார்வைக்காக திறக்கப்பட்டது. இருப்பினும், பறவைகள் மற்றும் பார்வையாளர்களின் பாதுகாப்பைக் கருத்தில் கொண்டு பறவைகள் வசிக்கும் பகுதியைச் சுற்றி தடுப்புகள் அமைக்கப்பட்டுள்ளன. இதன் காரணமாக, பார்வையாளர்கள் பறவைகளை குறிப்பிட்ட தொலைவில் இருந்தே கண்டு ரசிக்க அனுமதிக்கப்படுகின்றனர். மேலும், பூங்காவில் உள்ள பறவைகளின் உடல்நிலையை கால்நடை மருத்துவக் குழுவினர் 24 மணி நேரமும் தொடர்ந்து கண்காணித்து வருகின்றனர்.
