தவறு செய்பவர்கள் மீது நடவடிக்கை எடுக்கப்படும் என எச்சரிக்கை விடுப்பது மட்டுமே போதாது; அதைச் செயலிலும் காட்ட வேண்டும் என்று திமுக தலைவர் மு.க.ஸ்டாலின், முதல்-அமைச்சர் விஜய்யை விமர்சித்துள்ளார். இதுதொடர்பாக அவர் தனது எக்ஸ் தளத்தில் வெளியிட்ட பதிவில் கூறியிருப்பதாவது: “தவறு செய்தால் யாரையும் விடமாட்டேன்” என்று முதல்-அமைச்சர் விஜய், தனது கட்சி எம்.எல்.ஏ.க்களுக்கு கடுமையான எச்சரிக்கை விடுத்ததாகச் செய்தித்தாள்களில் தகவல் வெளியாகியுள்ளது. இது சர்ச்சையைத் தணிக்கும் நோக்கில் திட்டமிட்டு வெளியிடப்பட்ட செய்தியாகவே தெரிகிறது. முதல்-அமைச்சரின் எச்சரிக்கை உண்மையானதாக இருந்தால், பேரவைத் துணைத் தலைவர் பதவியின் கண்ணியத்தைக் குலைத்தவர் மீது வழக்குப்பதிவு செய்திருக்க வேண்டும்.
Advertisement
அதேபோல், கள்ளக்குறிச்சி தொகுதி எம்.எல்.ஏ. மீதும் உரிய நடவடிக்கை எடுத்திருக்க வேண்டும். ஆனால், தன்னை ஒரு கண்டிப்பான அதிகாரியாகக் காட்டிக்கொள்ளும் முதல்-அமைச்சர் செய்தது என்ன? சம்பந்தப்பட்ட இருவருக்கும் தீபாவளிப் பரிசுகளை வழங்கி அனுப்பி வைத்துள்ளார். இதுதான் அவர் கூறும் கடுமையான நடவடிக்கையா? பஞ்ச் வசனங்களைப் பேசி மட்டுமே காலத்தை ஓட்டுவதற்கு இது சினிமா கிடையாது. உண்மையான நடவடிக்கைகளை மேற்கொண்டு, தான் எவ்வளவு கண்டிப்பானவர் என்பதை முதல்-அமைச்சர் நிரூபிக்க வேண்டும். வெறும் பேச்சால் மட்டும் எந்தப் பலனும் ஏற்படாது.” இவ்வாறு மு.க.ஸ்டாலின் தனது பதிவில் தெரிவித்துள்ளார்.
