நாகப்பட்டினம் மாவட்டம் கீழையூர் ஊராட்சி ஒன்றிய அலுவலகத்தின் அரசு வங்கிக் கணக்கிலிருந்து ரூ.11 லட்சம் மர்மமான முறையில் ஆன்லைன் வழியாகத் திருடப்பட்ட சம்பவம் அதிர்ச்சியை ஏற்படுத்தியுள்ளது. கீழையூர் ஊராட்சி ஒன்றியத்திற்கு உட்பட்ட கிராம ஊராட்சிகளின் வங்கிக் கணக்குகளை அதிகாரிகள் இன்று (வெள்ளிக்கிழமை) வழக்கமான ஆய்வுக்கு உட்படுத்தினர். அப்போது, அரசு வங்கிக் கணக்கிலிருந்து அதிகாரிகளின் கவனத்திற்குத் தெரியாமல் ரூ.11 லட்சம் பணம் எடுக்கப்பட்டிருப்பது கண்டறியப்பட்டது. இதனால் அதிர்ச்சியடைந்த ஊரக வளர்ச்சித்துறை அதிகாரிகள், உடனடியாக சம்பந்தப்பட்ட வங்கி அதிகாரிகளைத் தொடர்புகொண்டு பணப் பரிவர்த்தனைகள் குறித்த விவரங்களைக் கேட்டறிந்தனர். முதற்கட்ட விசாரணையில், கேரளாவைச் சேர்ந்த இணைய ஹேக்கர்கள் அரசு வங்கிக் கணக்கை சட்டவிரோதமாக ஊடுருவி, பணத்தைத் திருடியிருப்பது தெரியவந்ததாகக் கூறப்படுகிறது.
Advertisement
பொதுமக்களின் வரிப்பணத்தை நிர்வகிக்கும் அரசு அலுவலகத்தின் வங்கிக் கணக்கிலேயே இணையக் குற்றவாளிகள் கைவரிசை காட்டியிருப்பது அதிகாரிகள் மத்தியில் பெரும் அதிர்ச்சியை ஏற்படுத்தியது. இதையடுத்து, ஊரக வளர்ச்சித்துறை சார்பில் சைபர் கிரைம் போலீசாரிடம் புகார் அளிக்கப்பட்டது. புகாரின் அடிப்படையில் வழக்குப் பதிவு செய்த சைபர் கிரைம் போலீசார், பணத்தைத் திருடியதாகக் கூறப்படும் கேரளாவைச் சேர்ந்த ஹேக்கர்களைக் கண்டறிந்து கைது செய்யத் தீவிர விசாரணை மேற்கொண்டு வருகின்றனர். இதற்காகத் தனிப்படையும் அமைக்கப்பட்டுள்ளது. அரசு வங்கிக் கணக்கிலிருந்து ரூ.11 லட்சம் ஆன்லைன் வழியாகக் கொள்ளையடிக்கப்பட்ட சம்பவம் நாகை மாவட்டத்தில் பரபரப்பை ஏற்படுத்தியுள்ளது.
