இந்திய கிரிக்கெட் அணியின் நட்சத்திர வேகப்பந்து வீச்சாளர் அர்ஷ்தீப் சிங், நடிகையும் மாடலுமான சம்ரீன் கவுருடன் நிச்சயதார்த்தம் செய்துகொண்டுள்ளார். இந்த மகிழ்ச்சியான தருணத்தை வெளிப்படுத்தும் புகைப்படங்களை இருவரும் தங்களது சமூக வலைதளப் பக்கங்களில் பகிர்ந்துள்ளனர். இந்திய அணியின் முக்கிய இடதுகை வேகப்பந்து வீச்சாளராகத் திகழ்பவர் அர்ஷ்தீப் சிங். சர்வதேசப் போட்டிகளில் தனது பந்துவீச்சுத் திறமையால் தனக்கென ரசிகர் பட்டாளத்தை உருவாக்கியுள்ளார். குறிப்பாக, 2024 மற்றும் 2026-ம் ஆண்டுகளில் டி20 உலகக் கோப்பையை வென்ற இந்திய அணியில் இடம்பிடித்து சாதனை படைத்தார். இதற்கிடையே, நடிகையும் மாடலுமான சம்ரீன் கவுருடன் அர்ஷ்தீப் சிங் காதல் உறவில் இருந்து வந்தார். தங்களது காதல் குறித்த தகவலை இருவரும் கடந்த ஜூலை மாதம் சமூக வலைதளங்கள் வாயிலாக முதன்முறையாகப் பகிரங்கப்படுத்தினர். இந்நிலையில், நவம்பர் 11-ம் தேதி நியூசிலாந்தில் இருவருக்கும் நிச்சயதார்த்தம் நடைபெற்றுள்ளது. இந்திய அணியுடன் நியூசிலாந்துக்குச் சுற்றுப்பயணம் சென்றுள்ள அர்ஷ்தீப்புடன் சம்ரீன் கவுரும் அங்கு சென்றிருந்தார். அங்கு கடற்கரைப் பகுதியில் சம்ரீன் கவுரிடம் தனது காதலை வெளிப்படுத்திய அர்ஷ்தீப், மோதிரம் அணிவித்து திருமணத்துக்கு சம்மதம் கேட்டுள்ளார். இதுதொடர்பான படங்களை இருவரும் இன்ஸ்டாகிராமில் வெளியிட்டுள்ளனர். ஒரு புகைப்படத்தில் அர்ஷ்தீப் மண்டியிட்டு சம்ரீனுக்கு மோதிரம் அணிவிப்பதும், மற்றொரு படத்தில் இருவரும் மகிழ்ச்சியுடன் ஒருவரையொருவர் அணைத்துக்கொள்வதும் இடம்பெற்றுள்ளது.
Advertisement
மேலும், அந்தப் பதிவில், ஒருவருக்கொருவர் வாழ்க்கையில் கிடைத்ததே மிகப்பெரிய மகிழ்ச்சி என்றும், இனி வாழ்நாள் முழுவதும் இணைந்து பயணிக்கப் போவதாகவும் இருவரும் நெகிழ்ச்சியுடன் குறிப்பிட்டுள்ளனர். இதனுடன் நிச்சயதார்த்தம் நடைபெற்ற '11.11.2026' என்ற தேதியையும் பதிவிட்டுள்ளனர். இந்த அறிவிப்பைத் தொடர்ந்து கிரிக்கெட் வீரர்கள், திரையுலகினர் மற்றும் ரசிகர்கள் பலரும் தம்பதிக்கு வாழ்த்துகளைத் தெரிவித்து வருகின்றனர். ஜம்மு - காஷ்மீரைச் சேர்ந்த சம்ரீன் கவுர், நடிகை மற்றும் மாடலாகப் பணியாற்றி வருகிறார். கடந்த 2018-ம் ஆண்டு நடைபெற்ற ஃபெமினா மிஸ் இந்தியா அழகிப் போட்டியில் இறுதிச்சுற்று வரை முன்னேறியவர். ரன்வீர் சிங் நடித்த '83', 'சர்தார் ஜி 2' உள்ளிட்ட திரைப்படங்களிலும், 'நெயில் பாலிஷ்' இணையத் தொடரிலும் நடித்துள்ளார். இதுதவிர, குரு ரந்தாவா, பாத்ஷா உள்ளிட்ட பிரபல பாடகர்களின் இசை ஆல்பங்களிலும் தோன்றியுள்ளார். கடந்த ஜூலை மாதம் தங்களது காதலை அறிவித்த இந்த ஜோடி, சில மாதங்களிலேயே நிச்சயதார்த்தம் செய்துகொண்டுள்ளது ரசிகர்களிடையே மகிழ்ச்சியை ஏற்படுத்தியுள்ளது. இருப்பினும், இருவரின் திருமணத் தேதி குறித்த அறிவிப்பு இதுவரை வெளியாகவில்லை.
