நடிகர் மணிகண்டனின் பிறந்தநாளை முன்னிட்டு, அவர் நடித்து வரும் "மக்கள் காவலன்" திரைப்படத்தின் சிறப்பு போஸ்டர் வெளியிடப்பட்டுள்ளது. மேலும், இன்று மாலை 6 மணிக்கு படத்தின் முக்கிய அறிவிப்பு வெளியாகும் என போஸ்டரில் தெரிவிக்கப்பட்டுள்ளது. "பைசன்" திரைப்படத்தைத் தொடர்ந்து, பிர்லா ஸ்டுடியோஸ் மற்றும் நீலம் ஸ்டுடியோஸ் இணைந்து உருவாக்கும் அடுத்த படமாக "மக்கள் காவலன்" அறிவிக்கப்பட்டுள்ளது. இப்படத்தை சந்தோஷ் குமார் எழுதி இயக்குகிறார். கண்ணியத்துடன் வாழ வேண்டும் என்ற எண்ணம் கொண்ட ஒரு சாதாரண மனிதனின் வாழ்க்கையை மையமாகக் கொண்டு இப்படத்தின் கதை அமைந்துள்ளது. ஊழல் நிறைந்த ஒரு அமைப்பு அவரை எதிர்கொள்ளும் நிலையில், அதற்கு அடிபணிவதா அல்லது எதிர்த்து போராடுவதா என்ற சூழல் அவருக்கு உருவாகிறது. படத்தின் கதாநாயகனாக கே. மணிகண்டன் நடிக்கிறார். அவருடன் வாகை சந்திரசேகர், ஏ. வெங்கடேஷ், ஆர்.கே.
Advertisement
விஜய்முருகன், சண்முகம் முத்துசாமி, சபுமோன், உன்னி மாயா, திவ்யா ஸ்ரீபாதா, ஜென்சன் திவாகர், லல்லு, ஜெமினி மணி மற்றும் ரகு உள்ளிட்டோர் முக்கிய கதாபாத்திரங்களில் நடித்துள்ளனர். பிரதீபன் செல்வரத்தினம் ஒளிப்பதிவை மேற்கொள்ள, அருள் மோசஸ் படத்தொகுப்பு பணிகளை கவனித்துள்ளார். "பைசன் காளமாடன்" படத்திற்குப் பிறகு மீண்டும் இணையும் இந்தக் கூட்டணியில், "மக்கள் காவலன்" படத்திற்கும் நிவாஸ் கே. பிரசன்னா இசையமைக்கிறார். இப்படம் விரைவில் வெளியாகும் என எதிர்பார்க்கப்படுகிறது. இந்நிலையில், இன்று தனது 43-வது பிறந்தநாளைக் கொண்டாடி வரும் மணிகண்டனுக்கு திரையுலகினர் உள்ளிட்ட பல்வேறு தரப்பினரும் வாழ்த்து தெரிவித்து வருகின்றனர். இதையொட்டி வெளியிடப்பட்டுள்ள "மக்கள் காவலன்"சிறப்பு போஸ்டர், மாலை 6 மணிக்கு வெளியாக உள்ள முக்கிய அறிவிப்பின் மீதான எதிர்பார்ப்பை அதிகரித்துள்ளது.
