தீபாவளி பண்டிகையை முன்னிட்டு மும்பையில் இருந்து தூத்துக்குடி மற்றும் கன்னியாகுமரிக்கு தலா ஒரு சிறப்பு ரெயில் இயக்க வேண்டும் என மும்பை தமிழின ரெயில் பயணிகள் சங்கம் கோரிக்கை விடுத்துள்ளது. மும்பை மற்றும் அதன் சுற்றுப்புறங்களில் வசிக்கும் ஆயிரக்கணக்கான தமிழர்கள், தீபாவளி காலங்களில் சொந்த ஊர்களுக்குச் செல்லும்போது கடும் போக்குவரத்து நெரிசலையும், ரெயில்களில் இடப்பற்றாக்குறையையும் எதிர்கொள்கின்றனர். குறிப்பாக தென் மாவட்டங்களைச் சேர்ந்த பயணிகள் தற்போதுள்ள ரெயில்களில் போதிய இடம் கிடைக்காமல் சிரமப்படுவதாக தெரிவிக்கப்பட்டுள்ளது.
Advertisement
இதையடுத்து, தென் மாவட்ட பயணிகளின் நீண்டகால தேவையை கருத்தில் கொண்டு, மும்பை–தூத்துக்குடி வழித்தடத்தில் ஒரு சிறப்பு ரெயிலும், மும்பை–கன்னியாகுமரி வழித்தடத்தில் மற்றொரு சிறப்பு ரெயிலும் இயக்க வேண்டும் என ரெயில்வே வாரியத்திடம் சங்கம் வலியுறுத்தியுள்ளது. பண்டிகை காலங்களில் மத்திய ரெயில்வே மற்றும் தெற்கு ரெயில்வே இணைந்து பல்வேறு சிறப்பு ரெயில்களை இயக்குவது வழக்கம். அதேபோல், இந்த ஆண்டும் மும்பையில் இருந்து தூத்துக்குடி மற்றும் கன்னியாகுமரிக்கு கூடுதல் ரெயில்கள் குறித்த அறிவிப்பு வெளியாகும் என பயணிகள் எதிர்பார்க்கின்றனர்.
