திருச்சி மாவட்டம், திருவெறும்பூர் அருகே தட்டான்குளம் வாய்க்காலில் பாலம் அமைக்கப்படாததால், உயிரிழந்த ஒருவரின் உடலை மயானத்திற்குக் கொண்டு செல்ல உறவினர்களும் பொதுமக்களும் வாய்க்காலில் இறங்கிச் செல்ல வேண்டிய அவல நிலை ஏற்பட்டுள்ளது. அடிப்படை வசதிகள் கூட இல்லாததால், இறப்புக்குப் பிறகும் துயரத்தைச் சந்திக்க வேண்டியுள்ளதாக அப்பகுதி மக்கள் வேதனை தெரிவித்துள்ளனர். திருவெறும்பூர் பகுதியில் உள்ள தட்டான்குளம் வாய்க்காலைக் கடப்பதற்கு இதுவரை முறையான பாலம் அமைக்கப்படவில்லை. இதனால், அப்பகுதியில் யாராவது உயிரிழந்தால், அவர்களின் உடலை இறுதிச்சடங்கிற்காக மயானத்துக்குக் கொண்டு செல்வது பெரும் சவாலாக இருந்து வருகிறது. இந்தச் சூழலில், தட்டான்குளம் பகுதியைச் சேர்ந்த ராஜசேகரன் என்பவர் உயிரிழந்தார்.
Advertisement
அவரது உடலை அடக்கம் செய்வதற்காக உறவினர்களும் ஊர் மக்களும் எடுத்துச் சென்றபோது, வாய்க்காலைக் கடப்பதற்கு வேறு பாதை இல்லாததால் தண்ணீர் ஓடிக்கொண்டிருந்த வாய்க்காலுக்குள் இறங்கினர். பின்னர், கடும் சிரமத்துக்கு மத்தியில் ராஜசேகரனின் உடலைத் தோளில் சுமந்தபடி மறுகரைக்குக் கொண்டு சென்றனர். இந்தச் சம்பவம் தொடர்பான காட்சிகள் வெளியாகி பார்ப்பவர்களிடையே சோகத்தை ஏற்படுத்தியுள்ளது. தட்டான்குளம் வாய்க்காலில் பாலம் இல்லாததே இதுபோன்ற சிரமங்களுக்குக் காரணம் என அப்பகுதி மக்கள் குற்றம்சாட்டுகின்றனர். எனவே, பொதுமக்களின் நீண்டகாலப் பிரச்சினைக்குத் தீர்வு காணும் வகையில், சம்பந்தப்பட்ட அதிகாரிகள் உடனடியாக நடவடிக்கை எடுத்து அங்கு புதிய பாலம் அமைக்க வேண்டும் என அவர்கள் வலியுறுத்தியுள்ளனர்.
