சென்னை தாம்பரம் அடுத்த முடிச்சூர் பகுதியில் செயல்பட்டு வரும் ஆவின் பால் பூத்தில் புகுந்த மர்ம நபர்கள், ரூ.25 ஆயிரம் ரொக்கம் மற்றும் ஐஸ்கிரீம்கள் உள்ளிட்ட பொருட்களை திருடிச் சென்ற சம்பவம் பரபரப்பை ஏற்படுத்தியுள்ளது. முடிச்சூர் பகுதியில் உள்ள இந்த ஆவின் பால் பூத்தின் உரிமையாளர், திங்கட்கிழமை இரவு வழக்கம்போல் வியாபாரத்தை முடித்துவிட்டு கடையை பூட்டிச் சென்றுள்ளார். நள்ளிரவில் அங்கு வந்த மர்ம நபர்கள், பூட்டை உடைத்து கடைக்குள் நுழைந்துள்ளனர். பின்னர் கல்லாப்பெட்டியில் இருந்த ரூ.25 ஆயிரம் பணத்தையும், கடையில் வைக்கப்பட்டிருந்த ஐஸ்கிரீம்கள் மற்றும் பால் பாக்கெட்டுகளையும் எடுத்துச் சென்றுள்ளனர். செவ்வாய்க்கிழமை காலை கடையை திறக்க வந்த உரிமையாளர், பூட்டு உடைக்கப்பட்டிருந்ததைக் கண்டு அதிர்ச்சியடைந்தார்.
Advertisement
மேலும், பணம் மற்றும் பொருட்கள் திருடப்பட்டிருப்பதும் தெரியவந்தது. இதையடுத்து அவர் போலீசாருக்கு தகவல் அளித்தார். தகவலறிந்து சம்பவ இடத்திற்கு வந்த போலீசார் விசாரணை நடத்தினர். கடையில் பொருத்தப்பட்டிருந்த சிசிடிவி கேமரா காட்சிகளை ஆய்வு செய்தபோது, மர்ம நபர்கள் கடைக்குள் புகுந்து திருடிய காட்சிகள் பதிவாகியிருந்தன. சிசிடிவி பதிவுகளை அடிப்படையாகக் கொண்டு கொள்ளை சம்பவத்தில் ஈடுபட்டவர்களை போலீசார் தேடி வருகின்றனர். இதற்காக தனிப்படை அமைக்கப்பட்டு தீவிர விசாரணை நடைபெற்று வருகிறது. இதனிடையே, மாடம்பாக்கம் மற்றும் சுற்றுவட்டாரப் பகுதிகளில் இரவு நேர ரோந்துப் பணியை அதிகரிக்க வேண்டும் என பொதுமக்கள் கோரிக்கை விடுத்துள்ளனர்.
