த.வெ.க. எம்.எல்.ஏ.க்களுக்கு முதல்-அமைச்சர் விஜய் போட்ட உத்தரவு என்ன? - பரபரப்பு தகவல்கள்

தமிழகத்தில் ஆட்சி அமைத்து ஆறு மாதங்களை நிறைவு செய்துள்ள த.வெ.க. அரசு, தற்போது பல்வேறு அரசியல் சவால்களை எதிர்கொண்டு வருகிறது. இந்த நிலையில், கட்சி எம்.எல்.ஏ.க்களின் செயல்பாடுகளைக் கட்டுப்படுத்தும் வகையில் முதல்-அமைச்சர் ஜோசப் விஜய் முக்கிய உத்தரவுகளைப் பிறப்பித்துள்ளதாக தகவல்கள் வெளியாகியுள்ளன. த.வெ.க. அரசு ஆறு மாதங்களுக்குள் கவிழ்ந்துவிடும் என்று தி.மு.க. உள்ளிட்ட எதிர்க்கட்சிகள் கணித்திருந்தன. ஆனால், அந்தக் காலக்கெடுவைக் கடந்து ஆட்சி தொடர்ந்து வருகிறது. இருப்பினும், ஆறு மாத கால ஆட்சியில் அரசு முழுமையான வெற்றியைப் பெற்றுள்ளதா என்ற விவாதமும் அரசியல் வட்டாரங்களில் எழுந்துள்ளது. சட்டப்பேரவையில் த.வெ.க.வுக்கு தற்போது 109 உறுப்பினர்களின் ஆதரவு மட்டுமே உள்ளது. தனிப்பெரும்பான்மையைப் பெறுவதற்கு மேலும் 9 இடங்கள் தேவைப்படும் சூழல் நிலவுகிறது. இதற்கிடையே, த.வெ.க. எம்.எல்.ஏ.க்களை தங்கள் பக்கம் இழுக்க தி.மு.க. மற்றும் அ.தி.மு.க. முயற்சித்து வருவதாக உளவுத்துறை மூலம் ஆளுங்கட்சிக்குத் தகவல் கிடைத்ததாகக் கூறப்படுகிறது. மேலும், த.வெ.க.வைச் சேர்ந்த சில அமைச்சர்கள் மற்றும் எம்.எல்.ஏ.க்கள், இரு எதிர்க்கட்சிகளின் முன்னாள் அமைச்சர்களுடன் ரகசியமாகத் தொடர்பில் இருப்பதாகவும் கட்சித் தலைமைக்குத் தகவல் சென்றுள்ளது. துணை சபாநாயகர் ரவிசங்கர், எம்.எல்.ஏ. அருள் விக்னேஷ் ஆகியோரின் செயல்பாடுகள் தொடர்பாக எழுந்த சர்ச்சைகளும் அரசுக்கு கூடுதல் நெருக்கடியை ஏற்படுத்தியுள்ளன. இதுவரை தமிழகத்தில் தி.மு.க. அல்லது அ.தி.மு.க. ஆட்சியில் இருந்தபோது மற்றொரு கட்சி பிரதான எதிர்க்கட்சியாகச் செயல்பட்டு வந்தது. ஆனால், 59 ஆண்டுகளாகத் தொடர்ந்த இரு திராவிடக் கட்சிகளின் அரசியல் ஆதிக்கத்துக்குப் பிறகு ஆட்சிக்கு வந்துள்ள த.வெ.க., தற்போது இரு கட்சிகளையும் எதிர்கொள்ள வேண்டிய நிலைக்குத் தள்ளப்பட்டுள்ளது. ஆறு மாத ஆட்சியில் ஊழல், லஞ்சம் போன்றவை ஓரளவு குறைந்திருப்பதாகவும், இதனால் மக்களிடையே அரசுக்கு நல்ல பெயர் கிடைத்துள்ளதாகவும் கூறப்படுகிறது. அதே நேரத்தில், தொடர் கொலைச் சம்பவங்கள் உள்ளிட்ட சட்டம் - ஒழுங்கு பிரச்சினைகள் அரசுக்கு பின்னடைவை ஏற்படுத்தி வருகின்றன. இதற்கிடையே, தேர்தல் காலத்தில் ஆட்டோக்களில் பயணம் செய்த சில த.வெ.க. எம்.எல்.ஏ.க்கள் தற்போது சொகுசு கார்களில் வலம் வருவதாகவும், நீர்வளத்துறை மற்றும் ஊரக வளர்ச்சித்துறை சார்ந்த பணிகளை மேற்கொள்ளும் ஒப்பந்ததாரர்களிடம் குறிப்பிட்ட தொகையை கமிஷனாகக் கேட்பதாகவும் முதல்-அமைச்சர் விஜய்க்குப் புகார்கள் சென்றுள்ளதாகத் தெரிகிறது.

இந்தப் புகார்களைத் தொடர்ந்து, கட்சி உறுப்பினர்களின் செயல்பாடுகள் குறித்து நேரடியாக எச்சரிக்கும் நோக்கில், மாமல்லபுரம் அருகே பேரூரில் உள்ள நட்சத்திர விடுதியில் நேற்று அனைத்து எம்.எல்.ஏ.க்களையும் முதல்-அமைச்சர் விஜய் சந்தித்துப் பேசியுள்ளார். இந்த ஆலோசனைக் கூட்டத்தில் சபாநாயகர் ஜே.சி.டி. பிரபாகர், அமைச்சர் ஸ்ரீநாத், எம்.எல்.ஏ.க்கள் முஸ்தபா, வி.எஸ். பாபு ஆகிய நான்கு பேர் பங்கேற்கவில்லை. விஜய் வருவதற்கு முன்பே கூட்டத்தில் கலந்துகொண்ட அனைத்து எம்.எல்.ஏ.க்களிடமும் வெள்ளைத்தாளில் கையெழுத்து பெறப்பட்டதாகவும், கூட்டத்தின் நோக்கம் குறித்த தகவலும் அவர்களுக்குத் தெரிவிக்கப்பட்டதாகவும் கூறப்படுகிறது. கூட்டத்திற்கு வந்த முதல்-அமைச்சர் விஜய், உளவுத்துறை ஏற்கனவே தயாரித்திருந்த கண்காணிப்புப் பட்டியலில் இடம்பெற்ற 30 எம்.எல்.ஏ.க்களைத் தனித்தனியாக அழைத்து எச்சரித்ததாகத் தகவல் வெளியாகியுள்ளது. தி.மு.க., அ.தி.மு.க. முன்னாள் அமைச்சர்களுடன் அவர்கள் வைத்துள்ள தொடர்புகள் குறித்து கேள்வி எழுப்பியதுடன், இனியும் இதுபோன்ற நடவடிக்கைகளில் ஈடுபட்டால் பாரபட்சமின்றி கடும் நடவடிக்கை எடுக்கப்படும் என்றும் எச்சரித்ததாகக் கூறப்படுகிறது. மேலும், எதிர்க்கட்சிகள் விரிக்கும் அரசியல் வலையில் த.வெ.க. எம்.எல்.ஏ.க்கள் யாரும் விழுந்துவிடக் கூடாது என்றும், ஆட்சியைக் கவிழ்ப்பதற்கான முயற்சிகளில் இரு கட்சிகளும் ஈடுபட்டு வருவதாகவும் விஜய் சுட்டிக்காட்டியதாகத் தெரிகிறது. இதையடுத்து, சில எம்.எல்.ஏ.க்கள் அரசு அதிகாரிகள், குறிப்பாக ஐ.ஏ.எஸ். அதிகாரிகள் மீது புகார்களை முன்வைத்துள்ளனர். இந்தக் குற்றச்சாட்டுகள் குறித்து விசாரணை நடத்தப்படும் என்று முதல்-அமைச்சர் உறுதியளித்ததாகவும் தகவல்கள் தெரிவிக்கின்றன. கூட்டத்தின் தொடக்கத்தில் பதற்றத்துடன் இருந்த எம்.எல்.ஏ.க்களுக்கு, நிறைவில் தீபாவளிப் பரிசுகள் வழங்கப்பட்டுள்ளன. ஆண் உறுப்பினர்களுக்குப் பட்டுவேட்டி, சட்டையுடன் இனிப்புகளும், பெண் உறுப்பினர்களுக்குப் பட்டுச் சேலையுடன் இனிப்புகளும் வழங்கப்பட்டதாகக் கூறப்படுகிறது. முதல்-அமைச்சரின் கடுமையான எச்சரிக்கையைத் தொடர்ந்து, கூட்டத்தில் பங்கேற்ற எம்.எல்.ஏ.க்கள் தங்களது சொந்த ஊர்களுக்குத் திரும்பியுள்ளனர். கட்சித் தலைமை விடுத்துள்ள இந்த எச்சரிக்கைக்குப் பிறகு, அவர்களின் செயல்பாடுகளில் என்னென்ன மாற்றங்கள் ஏற்படுகின்றன என்பதைப் பொறுத்திருந்துதான் பார்க்க வேண்டும்.