தமிழ் சமூகத்திற்கு புதிய அடையாளத்தை உருவாக்கியவர் பேரறிஞர் அண்ணா என்று முன்னாள் தமிழ்நாடு காங்கிரஸ் கமிட்டி தலைவர் செல்வப்பெருந்தகை புகழாரம் சூட்டியுள்ளார். அண்ணாவின் பிறந்தநாளை முன்னிட்டு அவர் வெளியிட்டுள்ள எக்ஸ் பதிவில், எளிய மக்களாலும் அதிகாரத்தை அடைய முடியும் என்பதை நிரூபித்த தொலைநோக்குச் சிந்தனையாளர் அண்ணா எனக் குறிப்பிட்டுள்ளார். மேலும், தமிழ் சமூகத்தின் அடையாளத்தை மாற்றியமைத்த அவரது முக்கிய பங்களிப்புகளை நினைவுகூர்ந்து போற்ற வேண்டும் என்றும் தெரிவித்துள்ளார். அரசியல் மற்றும் தனிப்பட்ட வாழ்க்கை என இரு தளங்களிலும் அனைவரும் பின்பற்ற வேண்டிய கொள்கைகளாக கடமை, கண்ணியம், கட்டுப்பாடு ஆகியவற்றை அண்ணா வலியுறுத்தியதாக செல்வப்பெருந்தகை கூறியுள்ளார். சாதி, மத வேறுபாடுகளை கடந்து மனிதநேயம் மற்றும் சுயமரியாதையை முன்னிறுத்திய சமூக மாற்றத்திற்கும் அவர் வழிவகுத்ததாக தெரிவித்துள்ளார்.
Advertisement
அதேபோல், “மாநிலத்தில் சுயாட்சி, மத்தியில் கூட்டாட்சி” என்ற கொள்கையின் மூலம் மாநில உரிமைகளுக்கான வலுவான அடித்தளத்தை அண்ணா அமைத்ததாகவும் அவர் குறிப்பிட்டுள்ளார். தமிழ்நாடு என்ற பெயரை மாநிலத்திற்கு சூட்டியதன் மூலம் தமிழ் மொழியின் பெருமையையும் தனித்துவத்தையும் உலக அளவில் அறியச் செய்தார் என்றும் தெரிவித்துள்ளார். அண்ணா கூறிய “எதையும் தாங்கும் இதயம் வேண்டும்” என்ற கருத்தை முன்வைத்து, துணிவு, இன்சொல் மற்றும் தொலைநோக்குப் பார்வையுடன் சமூக முன்னேற்றத்திற்காக பாடுபட உறுதியேற்க வேண்டும் என செல்வப்பெருந்தகை அழைப்பு விடுத்துள்ளார். தமிழ் மண்ணுக்கும் தமிழ் மொழிக்கும் பெருமை சேர்த்த பேரறிஞர் அண்ணாவின் புகழும் கொள்கைகளும் என்றும் நிலைத்திருக்க வேண்டும் என்றும் அவர் தெரிவித்துள்ளார்.
