தமிழகத்தில் டெங்கு காய்ச்சல் பாதிப்பு தொடர்ந்து அதிகரித்து வருகிறது. தினசரி 200-க்கும் மேற்பட்டோர் டெங்குவால் பாதிக்கப்பட்டு வருகின்றனர். நேற்று முன்தினம் மட்டும் சென்னையில் 79 பேர் உள்பட மாநிலம் முழுவதும் 228 பேருக்கு டெங்கு பாதிப்பு உறுதி செய்யப்பட்டது. சென்னையில் இந்த மாதத்தில் மட்டும் 900-க்கும் மேற்பட்டோர் டெங்கு காய்ச்சலால் பாதிக்கப்பட்டுள்ளனர். நடப்பாண்டில் இதுவரை தமிழகத்தில் 17 ஆயிரத்து 277 பேர் டெங்குவால் பாதிக்கப்பட்டுள்ளதாக தெரிவிக்கப்பட்டுள்ளது. தற்போது அரசு மற்றும் தனியார் மருத்துவமனைகளில் சுமார் 2 ஆயிரம் பேர் வரை டெங்குவுக்கு சிகிச்சை பெற்று வருகின்றனர். இதனிடையே, சென்னை அண்ணா பல்கலைக்கழக மாணவர் ஒருவருக்கு உண்ணிக்காய்ச்சல் ஏற்பட்டதைத் தொடர்ந்து, விடுதிகளில் தங்கி படிக்கும் மாணவர்களுக்கு மருத்துவ பரிசோதனை நடத்தப்பட்டு வருகிறது.
Advertisement
டெங்கு அறிகுறிகள் இருந்த 200-க்கும் மேற்பட்ட மாணவர்களுக்கு பரிசோதனை மேற்கொள்ளப்பட்டது. இதில் 20-க்கும் மேற்பட்ட மாணவர்களுக்கு ரத்த தட்டணுக்கள் குறைந்திருப்பது கண்டறியப்பட்டது. இதையடுத்து, அந்த மாணவர்கள் தங்களது சொந்த ஊர்களுக்குச் சென்று சிகிச்சை பெற்ற பின்னர் வகுப்புகளுக்கு திரும்புமாறு அறிவுறுத்தப்பட்டுள்ளனர். மேலும், தமிழகம் முழுவதும் நேற்று முன்தினம் 29 பேருக்கு உண்ணிக்காய்ச்சல் பாதிப்பு உறுதி செய்யப்பட்டுள்ளதாக சுகாதாரத்துறை அதிகாரிகள் தெரிவித்துள்ளனர்.
