தமிழகத்தில் காவல் நிலையங்களின் அன்றாட நிர்வாகச் செலவுகளைச் சமாளிக்கவும், லஞ்சம் மற்றும் ஊழலைக் கட்டுப்படுத்தவும் அனைத்து காவல் நிலையங்களுக்கும் வழங்கப்படும் மாதாந்திர நிதியை உயர்த்தி தமிழக அரசு உத்தரவிட்டுள்ளது. இதற்காக ஆண்டுக்கு ரூ.71.01 கோடி நிதி ஒதுக்கீடு செய்து அரசாணை வெளியிடப்பட்டுள்ளது. தமிழகத்தில் சட்டம் மற்றும் ஒழுங்கைப் பாதுகாப்பது, பெண்கள் மற்றும் குழந்தைகளுக்கு பாதுகாப்பான சூழலை ஏற்படுத்துவது, பொதுமக்களின் அமைதியை உறுதி செய்வது ஆகியவற்றில் காவல்துறை முக்கியப் பங்கு வகிக்கிறது. மேலும், குற்றங்களைத் தடுப்பது, குற்றவாளிகளைக் கண்டறிவது, போதைப்பொருள் பயன்பாட்டைக் கட்டுப்படுத்துவது, இணையவழிக் குற்றங்களை எதிர்கொள்வது உள்ளிட்ட பணிகளையும் காவல்துறை மேற்கொண்டு வருகிறது. இத்தகைய பணிகளின் விரிவாக்கத்தால் காவல்துறையின் நிர்வாக மற்றும் செயல்பாட்டுச் செலவுகள் அதிகரித்துள்ளன. இதைக் கருத்தில் கொண்டு, காவல் நிலையங்களின் அன்றாடத் தேவைகளுக்காக வழங்கப்படும் எதிர்பாராச் செலவு நிதியை உயர்த்த அரசு முடிவு செய்துள்ளது. காவல் நிலையங்களின் முறையான செலவுகளுக்குப் போதிய நிதி கிடைப்பதன் மூலம், அதிகாரப்பூர்வமற்ற வழிகளில் பணத்தைப் பெற வேண்டிய சூழலைக் குறைக்க முடியும் என்றும், இதன் மூலம் லஞ்சம் மற்றும் ஊழலைத் தடுப்பதற்கான நடவடிக்கைகளை வலுப்படுத்த முடியும் என்றும் அரசு தெரிவித்துள்ளது.
Advertisement
அரசு அலுவலகங்களில் லஞ்சம் மற்றும் ஊழலுக்கு இடமில்லாத நிலையை உருவாக்க வேண்டும் என்ற முதல்-அமைச்சர் விஜய்யின் நோக்கத்தின் அடிப்படையில், 2026-27ஆம் ஆண்டுக்கான காவல்துறை மானியக் கோரிக்கையின்போது காவல் நிலையங்களுக்கான நிதி உயர்வு அறிவிக்கப்பட்டது. இதன்படி, தமிழகத்தில் உள்ள காவல் நிலையங்கள், அங்கு பதிவாகும் குற்றங்களின் எண்ணிக்கைக்கு ஏற்ப மூன்று பிரிவுகளாக வகைப்படுத்தப்பட்டுள்ளன. இந்தப் பிரிவுகளின் அடிப்படையில், இதுவரை மாதந்தோறும் வழங்கப்பட்டு வந்த நிதி பின்வருமாறு உயர்த்தப்பட்டுள்ளது: - முதல் பிரிவு: ரூ.3,750-லிருந்து ரூ.30,000 ஆக உயர்வு. - இரண்டாம் பிரிவு: ரூ.6,000-லிருந்து ரூ.40,000 ஆக உயர்வு. - மூன்றாம் பிரிவு: ரூ.8,250-லிருந்து ரூ.50,000 ஆக உயர்வு. இந்த நிதி உயர்வைச் செயல்படுத்துவதற்காக ஆண்டுதோறும் ரூ.71 கோடியே 1 லட்சத்து 54 ஆயிரம் ஒதுக்கீடு செய்யப்பட்டுள்ளது. இதற்கான அரசாணையையும் தமிழக அரசு வெளியிட்டுள்ளது.
