தடுப்புகளும் இல்லை... எச்சரிக்கை பலகைகளும் இல்லை! ஊத்தங்கரை அருகே தொடரும் விபத்துகள்

கிருஷ்ணகிரி மாவட்டம், ஊத்தங்கரை அருகே தேசிய நெடுஞ்சாலையில் பாலம் அமைக்கும் பணிக்காகத் தோண்டப்பட்ட பள்ளத்தில் கார் ஒன்று இறங்கியதில், அதில் பயணம் செய்த 6 பேர் லேசான காயங்களுடன் உயிர் தப்பினர். ஊத்தங்கரை அருகே உள்ள தேசிய நெடுஞ்சாலையில் தற்போது பாலம் கட்டுமானப் பணிகள் நடைபெற்று வருகின்றன. இதற்காக சாலையோரத்தில் பள்ளம் தோண்டப்பட்டு பணிகள் மேற்கொள்ளப்பட்டு வருகின்றன. இந்நிலையில், அந்த வழியாக 6 பேர் பயணம் செய்த கார் ஒன்று சென்றபோது, எதிர்பாராதவிதமாக கட்டுமானப் பணிக்காகத் தோண்டப்பட்ட பள்ளத்திற்குள் இறங்கியது. இதனால் காரில் இருந்தவர்கள் பெரும் அதிர்ச்சியடைந்தனர். இந்த விபத்தில் காரில் இருந்த 6 பேருக்கும் லேசான காயங்கள் ஏற்பட்டன. இருப்பினும், அதிர்ஷ்டவசமாக அனைவரும் உயிர் தப்பினர். விபத்து நடந்ததை அறிந்த அப்பகுதி மக்கள் உடனடியாக அங்கு வந்து உதவினர். இதனிடையே, கட்டுமானப் பணிகள் நடைபெறும் பகுதியில் வாகன ஓட்டிகளுக்கு எச்சரிக்கை விடுக்கும் அறிவிப்புப் பலகைகள் எதுவும் வைக்கப்படவில்லை என்றும், தோண்டப்பட்ட பள்ளத்தைச் சுற்றி பாதுகாப்புத் தடுப்புகள் அமைக்கப்படவில்லை என்றும் வாகன ஓட்டிகள் புகார் தெரிவிக்கின்றனர்.

குறிப்பாக, இரவு நேரங்களில் அந்த வழியாகச் செல்லும் வாகன ஓட்டிகளுக்கு பள்ளம் இருப்பது தெரியாமல் விபத்தில் சிக்கும் சூழல் நிலவுவதாக அவர்கள் அச்சம் தெரிவிக்கின்றனர். மேலும், இதே பகுதியில் அடிக்கடி விபத்துகள் நடைபெறுவதாகவும் குற்றம் சாட்டுகின்றனர். எனவே, தேசிய நெடுஞ்சாலையில் நடைபெறும் கட்டுமானப் பணிகள் உள்ள இடங்களில் பாதுகாப்புத் தடுப்புகளை அமைப்பதுடன், ஒளிரும் எச்சரிக்கை விளக்குகள் மற்றும் முன்னறிவிப்புப் பலகைகளையும் நிறுவ வேண்டும் என சம்பந்தப்பட்ட அதிகாரிகளுக்கு வாகன ஓட்டிகள் கோரிக்கை விடுத்துள்ளனர்.