சிறுமிகள் பாலியல் வன்கொடுமை செய்யப்பட்ட வழக்கில் கைது செய்யப்பட்டுள்ள ஜெம் கிரானைட்ஸ் உரிமையாளர் ஆர். வீரமணியின் ராயப்பேட்டை வீட்டின் பின்புறத் தோட்டத்தில் சடலம் புதைக்கப்பட்டுள்ளதாக வெளியான தகவலைத் தொடர்ந்து, சிறப்பு புலனாய்வுக் குழுவினர் தீவிர சோதனையில் ஈடுபட்டுள்ளனர். பல சிறுமிகளைப் பாலியல் வன்கொடுமைக்கு உட்படுத்தியதாக அளிக்கப்பட்ட புகாரின் அடிப்படையில், கடந்த ஆகஸ்ட் மாதம் ஜெம் வீரமணி கைது செய்யப்பட்டு சிறையில் அடைக்கப்பட்டார். இந்தக் குற்றச்செயல்களுக்கு உதவியதாகக் கூறப்படும் அவரது கார் ஓட்டுநர்கள் மற்றும் உதவியாளர்கள் சிலரையும் போலீசார் கைது செய்தனர். இதையடுத்து, சிறப்பு புலனாய்வுக் குழுவினர் கைது செய்யப்பட்டவர்களிடம் விரிவான விசாரணை நடத்தினர். அப்போது, வீரமணியின் ராயப்பேட்டை வீட்டின் பின்புறத் தோட்டத்தில் பாலியல் வன்கொடுமைக்கு ஆளான சிறுமி ஒருவர் உடல்நலம் பாதிக்கப்பட்டு உயிரிழந்ததாக அதிர்ச்சித் தகவல் கிடைத்துள்ளது.
Advertisement
மேலும், உயிரிழந்த சிறுமியின் உடல் அங்கேயே புதைக்கப்பட்டதாக கைது செய்யப்பட்ட ஓட்டுநர் பாலா வாக்குமூலம் அளித்துள்ளதாகக் கூறப்படுகிறது. இந்த வாக்குமூலத்தின் அடிப்படையில், இன்று (சனிக்கிழமை) சிறப்பு புலனாய்வுக் குழுவினர் மற்றும் போலீசார் ஜேசிபி உள்ளிட்ட கனரக இயந்திரங்களுடன் வீரமணியின் ராயப்பேட்டை வீட்டிற்குச் சென்றனர். அங்குள்ள பின்புறத் தோட்டத்தில் சுமார் 10 அடி ஆழம் வரை பள்ளம் தோண்டி சோதனை மேற்கொண்டு வருகின்றனர். சோதனை நடைபெறும் இடத்தில் பொதுமக்கள் திரளுவதைத் தடுக்கும் வகையிலும், பாதுகாப்புப் பிரச்சினைகள் ஏற்படாமல் இருக்கவும் ஏராளமான போலீசார் பாதுகாப்புப் பணியில் ஈடுபடுத்தப்பட்டுள்ளனர். தற்போது தோண்டும் பணிகள் தொடர்ந்து நடைபெற்று வரும் நிலையில், அங்கு ஏதேனும் சடலம் கண்டெடுக்கப்பட்டதா என்பது குறித்த அதிகாரப்பூர்வ விவரங்கள் சோதனை நிறைவடைந்த பின்னரே தெரியவரும் என காவல்துறை வட்டாரங்கள் தெரிவித்துள்ளன.
