ஒடிசாவில் ரூ.169 கோடியில் ஆர்.பி.ஐ. தரவு மையம்: பிரதமர் மோடி திறந்து வைத்தார்

ஒடிசா மாநிலம் புவனேஸ்வரில், இந்திய ரிசர்வ் வங்கியின் (ஆர்.பி.ஐ.) சார்பில் ரூ.169 கோடி செலவில் அமைக்கப்பட்டுள்ள தரவு மையம் மற்றும் சைபர் பாதுகாப்புப் பயிற்சி நிறுவனத்தைப் பிரதமர் நரேந்திர மோடி திறந்து வைத்தார். ஒடிசாவின் ஜட்னி பகுதியில் உள்ள இன்போ வேலி-II வளாகத்தில் 18.55 ஏக்கர் நிலப்பரப்பில் இந்தத் தரவு மையம் கட்டப்பட்டுள்ளது. இதற்கான அடிக்கல் 2023-ம் ஆண்டு மார்ச் 22-ம் தேதி, அப்போதைய ரிசர்வ் வங்கி ஆளுநர் சக்திகாந்த தாஸால் நாட்டப்பட்டது. இந்தத் தரவு மையத்தில், முக்கியப் பணப்பரிவர்த்தனைகள் மற்றும் பணப்பட்டுவாடா தொடர்பான அமைப்புகள் உட்பட ரிசர்வ் வங்கியின் பல்வேறு முக்கியத் திட்டங்களுக்குத் தேவையான கணினி உள்கட்டமைப்புகள் செயல்படும். வங்கியின் தொழில்நுட்பத் தேவைகளைப் பூர்த்தி செய்வதோடு, பாதுகாப்பான மற்றும் தடையற்ற சேவைகளை வழங்கவும், எதிர்காலத் தேவைகளுக்கு ஏற்ப விரிவாக்கம் செய்யவும் வசதியாக இந்த மையம் வடிவமைக்கப்பட்டுள்ளது. இந்தியாவில் டிஜிட்டல் நிதிச் சேவைகளின் பயன்பாடு தொடர்ந்து அதிகரித்து வரும் நிலையில், அவற்றின் செயல்திறன், நம்பகத்தன்மை மற்றும் பாதுகாப்பை மேம்படுத்த இந்த மையம் உதவும் என அதிகாரிகள் தெரிவித்துள்ளனர். தொழில்நுட்பத்தை அடிப்படையாகக் கொண்ட இந்திய நிதிப் பொருளாதாரத்தின் வளர்ச்சிக்கு இது வலுவான டிஜிட்டல் அடித்தளமாக அமையும் என்றும் தெரிவிக்கப்பட்டுள்ளது. சைபர் பாதுகாப்புப் பயிற்சி நிறுவனமும் தொடக்கம் தரவு மையத்துடன் இணைந்து சைபர் பாதுகாப்புப் பயிற்சி நிறுவனமும் திறந்து வைக்கப்பட்டுள்ளது. இணையவழிப் பாதுகாப்புத் திறன்களை மேம்படுத்தும் நோக்கில் உருவாக்கப்பட்டுள்ள இந்த நிறுவனம், சைபர் பாதுகாப்பு மற்றும் நிறுவனங்களின் தொழில்நுட்பக் கட்டமைப்புகள் தொடர்பான பயிற்சிகளையும் ஆராய்ச்சிகளையும் மேற்கொள்ளும். மேலும், ஒட்டுமொத்த நிதித்துறையிலும் தொழில்நுட்பத் திறன்களை மேம்படுத்துவதற்கான நடவடிக்கைகள் இங்கு முன்னெடுக்கப்படும். டிஜிட்டல் பரிவர்த்தனைகள் அதிகரித்து வரும் சூழலில், இணையவழித் தாக்குதல்கள் மற்றும் பாதுகாப்பு அச்சுறுத்தல்களை எதிர்கொள்ளத் தேவையான திறன்களை வளர்ப்பதில் இந்த நிறுவனம் முக்கியப் பங்கு வகிக்கும் என எதிர்பார்க்கப்படுகிறது. ஜட்னி பகுதி தேர்வு செய்யப்பட்டதன் காரணம் இந்தத் தரவு மையத்தை அமைப்பதற்கு ஜட்னி பகுதி தேர்ந்தெடுக்கப்பட்டதில் பாதுகாப்பு அம்சங்களும் முக்கியக் காரணமாக உள்ளன.

நிலநடுக்க அபாயம் அதிகமுள்ள பகுதிகள் மற்றும் சர்வதேச எல்லைகளை ஒட்டிய அதிக ஆபத்துள்ள இடங்களிலிருந்து விலகி இருப்பதால், இயற்கைப் பேரிடர்கள் மற்றும் புவிசார் அரசியல் சூழலால் ஏற்படக்கூடிய பாதிப்புகளைக் குறைக்க முடியும் என்று அதிகாரி ஒருவர் தெரிவித்துள்ளார். நவி மும்பையில் ஏற்கெனவே அமைந்துள்ள தரவு மையத்தைத் தொடர்ந்து, ஜட்னியில் உருவாக்கப்பட்டுள்ள இந்த மையம் ரிசர்வ் வங்கியின் இரண்டாவது தரவு மையமாகும் என்று ஒடிசா முதல்வர் மோகன் சரண் மாஜி குறிப்பிட்டுள்ளார். இதுகுறித்து அவர் வெளியிட்டுள்ள சமூக வலைதளப் பதிவில், புதிய தரவு மையம் ஒடிசாவின் வளர்ச்சிப் பயணத்துக்கு மேலும் வலுசேர்க்கும் என்று தெரிவித்துள்ளார். 2024-ம் ஆண்டு ஒடிசாவில் பா.ஜ.க. அரசு பொறுப்பேற்ற பிறகு, பிரதமர் மோடி அந்த மாநிலத்துக்கு வருவது இது ஒன்பதாவது முறை என்றும் அவர் குறிப்பிட்டுள்ளார். பிரதமர் வருகையையொட்டி பலத்த பாதுகாப்பு பிரதமர் நரேந்திர மோடி மாலை 4.15 மணியளவில் இந்திய விமானப்படையின் சிறப்பு விமானம் மூலம் புவனேஸ்வரில் உள்ள பிஜு பட்நாயக் சர்வதேச விமான நிலையத்தை வந்தடைந்தார். பின்னர் ஹெலிகாப்டர் மூலம் குர்தா பகுதிக்குச் சென்ற அவர், அங்கிருந்து சாலை வழியாகத் தரவு மையத்தை அடைந்தார். பிரதமரின் வருகையை முன்னிட்டு சுமார் 2,100 போலீசார் பாதுகாப்புப் பணியில் ஈடுபடுத்தப்பட்டனர். மேலும், மாலை 5.40 மணி முதல் 6.40 மணி வரை தரவு மையத்தையும் விமான நிலையத்தையும் இணைக்கும் சாலையில் போக்குவரத்துக் கட்டுப்பாடுகள் அமல்படுத்தப்பட்டன. இந்த நிகழ்ச்சியில் மத்திய நிதி அமைச்சர் நிர்மலா சீதாராமன், ரிசர்வ் வங்கி ஆளுநர் சஞ்சய் மல்ஹோத்ரா, ஒடிசா ஆளுநர் பிரஜ்மோகன் ராம், முதல்வர் மோகன் சரண் மாஜி, மத்திய பழங்குடியினர் நலத்துறை அமைச்சர் ஜுவல் ஓரம் மற்றும் துணை முதல்வர்கள் கனக் வர்தன் சிங் தியோ, பிரவதி பரிடா உள்ளிட்டோர் கலந்து கொண்டனர். புதிய தரவு மையமும் சைபர் பாதுகாப்புப் பயிற்சி நிறுவனமும் செயல்பாட்டுக்கு வந்துள்ளதன் மூலம், இந்தியாவின் டிஜிட்டல் நிதிக் கட்டமைப்பை வலுப்படுத்தவும், வளர்ந்து வரும் தொழில்நுட்பத் தேவைகளை எதிர்கொள்ளவும் முக்கிய முன்னெடுப்பு மேற்கொள்ளப்பட்டுள்ளது.