ஆந்திர மாநிலம் சித்தூர் அருகே சாலையோரம் நிறுத்தி வைக்கப்பட்டிருந்த லாரி மீது கார் மோதிய விபத்தில், தமிழ்நாட்டைச் சேர்ந்த பெண் ஒருவர் சம்பவ இடத்திலேயே உயிரிழந்தார். மேலும், ஒரே குடும்பத்தைச் சேர்ந்த 5 பேர் படுகாயமடைந்தனர்.கிருஷ்ணகிரி மாவட்டத்தைச் சேர்ந்த ஒரே குடும்பத்தினர் திருப்பதி ஏழுமலையான் கோயிலுக்குச் சென்று சாமி தரிசனம் செய்துள்ளனர். தரிசனத்தை முடித்துவிட்டு, இன்று (வியாழக்கிழமை) அதிகாலை காரில் கிருஷ்ணகிரியில் உள்ள தங்களது சொந்த ஊருக்குத் திரும்பிக் கொண்டிருந்தனர். அவர்கள் சித்தூர் தேசிய நெடுஞ்சாலை பகுதியில் சென்றபோது, எதிர்பாராதவிதமாக கார் கட்டுப்பாட்டை இழந்ததாக கூறப்படுகிறது. இதையடுத்து சாலையோரத்தில் நிறுத்தப்பட்டிருந்த லாரியின் பின்புறத்தில் கார் வேகமாக மோதியது. இதில் காரின் முன்பகுதி பலத்த சேதமடைந்து நொறுங்கியது. விபத்தில் காரில் பயணம் செய்த கிருஷ்ணகிரியைச் சேர்ந்த பெண் ஒருவர் உடல் நசுங்கி சம்பவ இடத்திலேயே உயிரிழந்தார்.
Advertisement
கார் ஓட்டுநர் உள்ளிட்ட மேலும் 5 பேர் பலத்த காயமடைந்தனர். தகவல் அறிந்து சம்பவ இடத்திற்கு வந்த உள்ளூர் பொதுமக்கள் மற்றும் சித்தூர் போலீசார், காயமடைந்தவர்களை மீட்டு அருகிலுள்ள அரசு மருத்துவமனைக்கு அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. உயிரிழந்த பெண்ணின் உடல் பிரேதப் பரிசோதனைக்காக மருத்துவமனைக்கு அனுப்பி வைக்கப்பட்டது. அதிகாலை நேரத்தில் ஓட்டுநருக்கு ஏற்பட்ட தூக்க கலக்கம் அல்லது கவனக்குறைவு காரணமாக விபத்து நிகழ்ந்திருக்கலாம் என்ற கோணத்தில் போலீசார் விசாரணை மேற்கொண்டு வருகின்றனர். மேலும், விபத்துக்குள்ளான காரின் பதிவு எண்ணை அடிப்படையாகக் கொண்டு, கிருஷ்ணகிரி போலீசாரின் உதவியுடன் விபத்தில் சிக்கியவர்களின் முழு விவரங்களையும் சேகரிக்கும் பணியும் நடைபெற்று வருகிறது.
