தி.மு.க. முன்னாள் அமைச்சரான அன்பில் மகேஷ் தாக்கல் செய்துள்ள ஜாமீன் மனு மீதான விசாரணையை சென்னை உயர் நீதிமன்றம் நவம்பர் 17-ம் தேதிக்கு ஒத்திவைத்துள்ளது. தமிழகத்தில் உள்ள தனியார் பள்ளிகளுக்கு நிரந்தர அங்கீகாரம் உள்ளிட்ட அரசு அனுமதிகளைப் பெற்றுத் தருவதாகக் கூறி, கட்சி நிதி என்ற பெயரில் பல கோடி ரூபாய் லஞ்சம் பெறப்பட்டதாக அன்பில் மகேஷ் மீது வழக்குப்பதிவு செய்யப்பட்டது. இந்த விவகாரம் தொடர்பாக பி.டி. அரசகுமார் ஏற்கெனவே கைது செய்யப்பட்டுள்ளார். முன்னாள் எம்.எல்.ஏ. முத்துக்குமார் மற்றும் சரவணன் ஆகியோர் நீதிமன்றத்தில் சரணடைந்துள்ளனர். இந்த வழக்கில் கைது செய்யப்பட்டு சிறையில் அடைக்கப்பட்டுள்ள அன்பில் மகேஷ், ஜாமீன் கோரி சிறப்பு நீதிமன்றத்தில் மனு தாக்கல் செய்திருந்தார். ஆனால், லஞ்ச ஒழிப்பு வழக்குகளை விசாரிக்கும் அந்த நீதிமன்றம் மனுவை நிராகரித்தது. இதையடுத்து, ஜாமீன் கோரி சென்னை உயர் நீதிமன்றத்தை அவர் நாடினார்.
Advertisement
இந்த மனுவை அவசர வழக்காக விசாரிக்க வேண்டும் எனக் கோரி, அன்பில் மகேஷ் தரப்பில் மூத்த வழக்கறிஞர் பி. வில்சன், நீதிபதி வி. லட்சுமி நாராயணனிடம் முறையிட்டார். ஜாமீன் மனுவுக்கு வழக்கு எண் வழங்கும் நடைமுறை நிறைவடைந்தால், அன்றே விசாரணைக்கு எடுத்துக்கொள்ளப்படும் என நீதிபதி தெரிவித்திருந்தார். இதற்கிடையே, தன் மீதான வழக்கை ரத்து செய்யக் கோரி அன்பில் மகேஷ் தாக்கல் செய்த மனுவின் விசாரணையை ஒத்திவைக்க வேண்டும் என்ற அவரது தரப்பு கோரிக்கையையும் நீதிபதி ஏற்றுக்கொண்டார். அதன்படி, அந்த வழக்கின் விசாரணை நவம்பர் 30-ம் தேதிக்கு மாற்றப்பட்டது. இந்நிலையில், இன்று நடைபெற்ற விசாரணையின்போது, சென்னை மத்திய குற்றப்பிரிவு தரப்பில் பதிலளிக்க கூடுதல் அவகாசம் கோரப்பட்டது. இதனைத் தொடர்ந்து, அன்பில் மகேஷின் ஜாமீன் மனு மீதான விசாரணையை நவம்பர் 17-ம் தேதிக்கு ஒத்திவைத்து சென்னை உயர் நீதிமன்றம் உத்தரவிட்டது.
