கோவையில் ஆயிரக்கணக்கானோர் திரண்டிருந்த நிலையில், 30 ஆண்டுகளாகத் தனது ரசிகராக இருக்கும் ரங்கராஜை அடையாளம் கண்டு, காரை நிறுத்தி அன்புடன் நலம் விசாரித்த தமிழக முதல்வர் சி. ஜோசப் விஜய்யின் செயல் நெகிழ்ச்சியை ஏற்படுத்தியுள்ளது. இந்தச் சம்பவம் தற்போது அரசியல் வட்டாரங்களிலும் சமூக வலைதளங்களிலும் கவனம் பெற்றுள்ளது. ரூ.300 கோடி செலவில் உருவாக்கப்பட்டுள்ள பெரியார் அறிவுலகத்தைத் திறந்து வைப்பதற்காக தமிழக முதல்வர் சி. ஜோசப் விஜய் இன்று (வெள்ளிக்கிழமை) கோவைக்கு வருகை தந்தார். கோவை சர்வதேச விமான நிலையத்திற்கு வெளியே தமிழக வெற்றிக் கழகத் தொண்டர்களும் பொதுமக்களும் திரண்டு அவருக்கு உற்சாக வரவேற்பு அளித்தனர். அப்போது, சாலையோரம் நின்றிருந்த மக்களைப் பார்த்தபடி முதல்வர் விஜய் காரில் மெதுவாகச் சென்றார். விமான நிலையத்தின் பிரதான சாலையில் பெருந்திரளான மக்கள் கூடியிருந்தனர். அந்தக் கூட்டத்தில் மேட்டுப்பாளையத்தைச் சேர்ந்த மூத்த ரசிகர் மன்ற நிர்வாகி ரங்கராஜை விஜய் பார்த்ததும் அடையாளம் கண்டுகொண்டார். இதையடுத்து, காரை நிறுத்தச் சொல்லி, பாதுகாப்புப் பணியாளர்கள் மூலம் அவரை அருகில் வரவழைத்தார். பாதுகாப்பு ஏற்பாடுகளைக் கடந்து காரின் அருகே வந்த ரங்கராஜின் தோளில் அன்புடன் கைபோட்ட விஜய், அவரது நலன் குறித்தும் குடும்பத்தினரின் நலன் குறித்தும் விசாரித்தார்.
Advertisement
முதல்வர் பதவிக்கு உயர்ந்த பிறகும், முன்பிருந்த அதே அன்புடன் தன்னை அணுகிய விஜய்யின் செயல் அங்கிருந்த தொண்டர்களை நெகிழச் செய்தது. இந்தச் சந்திப்பால் உணர்ச்சிவசப்பட்ட ரங்கராஜ், பின்னர் செய்தியாளர்களிடம் பேசும்போது, 30 ஆண்டுகளாக விஜய்யின் ரசிகராக இருப்பதாகவும், 'ஒன்ஸ் மோர்' திரைப்படம் வெளியான காலத்திலிருந்தே அவருடன் பயணித்து வருவதாகவும் தெரிவித்தார். மேலும், தமிழகத்தின் முதல்வராக உயர்ந்த பின்னரும், இவ்வளவு பெரிய கூட்டத்திலும் தன்னை அடையாளம் கண்டுகொண்டது மகிழ்ச்சியளிப்பதாக நெகிழ்ச்சியுடன் கூறினார். திரையுலகில் இருந்து விலகி முழுநேர அரசியலில் ஈடுபட்டு முதல்வராகப் பொறுப்பேற்றுள்ள விஜய், தனது ஆரம்பகால ரசிகர்களையும் தொண்டர்களையும் நினைவில் வைத்திருப்பதை வெளிப்படுத்தும் இந்தச் சம்பவத்தின் வீடியோ காட்சிகள் சமூக வலைதளங்களில் வேகமாகப் பகிரப்பட்டு வருகின்றன. தமிழக வெற்றிக் கழகத் தொண்டர்கள் பலரும் இந்த நெகிழ்ச்சியான தருணத்தைப் பகிர்ந்து வருகின்றனர்.
