வங்கி ஊழியர்கள் நாளை முதல் 30-ந்தேதி வரை நாடு முழுவதும் 3 நாட்கள் வேலைநிறுத்தத்தில் ஈடுபட உள்ளனர். வாரத்திற்கு 5 நாட்கள் வேலை, ஓய்வூதியப் பலன்கள், காலியாக உள்ள பணியிடங்களை நிரப்புதல், தற்காலிக ஊழியர்களை நிரந்தரமாக்குதல் உள்ளிட்ட கோரிக்கைகளை வலியுறுத்தி இந்த வேலைநிறுத்தம் நடைபெறுகிறது. வேலைநிறுத்தம் காரணமாக வங்கி சேவைகளில் பாதிப்பு ஏற்படக்கூடும் என்பதால், வாடிக்கையாளர்களின் சிரமத்தை குறைக்கும் வகையில் இன்று வங்கிகள் வழக்கம்போல் செயல்படும் என மத்திய அரசு தெரிவித்துள்ளது. வேலைநிறுத்தம் தொடங்குவதற்கு முன்பாக அத்தியாவசிய வங்கி பரிவர்த்தனைகளை முடித்துக்கொள்ளுமாறு வங்கிகள் தங்கள் வாடிக்கையாளர்களுக்கு அறிவுறுத்தியுள்ளன.
Advertisement
பணத் தேவைகளுக்கு ஏ.டி.எம். மையங்கள், இணையவழி வங்கி சேவைகள் மற்றும் யு.பி.ஐ. போன்ற டிஜிட்டல் வசதிகளை பயன்படுத்துமாறும் கேட்டுக்கொண்டுள்ளன. இதுதொடர்பாக பல்வேறு பொதுத்துறை மற்றும் தனியார் வங்கிகள் தங்களது வாடிக்கையாளர்களுக்கு குறுந்தகவல்கள் மூலம் முன்னெச்சரிக்கை அறிவிப்புகளை அனுப்பி வருகின்றன. இதனால், வார இறுதி விடுமுறையைத் தொடர்ந்து வேலைநிறுத்தம் நடைபெற உள்ள நிலையில், பொதுமக்களுக்கு ஏற்படும் பாதிப்புகளை குறைக்கும் நடவடிக்கையாக இன்று வங்கிகள் திறந்திருக்கும். வாடிக்கையாளர்கள் இந்த வாய்ப்பை பயன்படுத்தி தேவையான வங்கி பணிகளை முன்கூட்டியே முடித்துக்கொள்ளலாம்.
