தமிழகத்தில் ஆண்டுதோறும் சுமார் 7.80 லட்சம் குழந்தைகள் பிறக்கின்றனர். இதில் சுமார் 4.20 லட்சம் பிரசவங்கள் அரசு மருத்துவமனைகளில் நடைபெறுகின்றன. அரசு மருத்துவமனைகளில் நடைபெறும் பிரசவங்களின் எண்ணிக்கையை அதிகரிக்கும் நோக்கில், குழந்தைகளுக்கு ‘தாய்மாமன் தங்க மோதிரம்’ வழங்கும் திட்டத்தை தமிழக அரசு அறிவித்தது. அதன்படி, 22.6.2026 முதல் அரசு மருத்துவமனைகளில் பிறக்கும் ஒவ்வொரு குழந்தைக்கும் ஒரு கிராம் தங்க மோதிரம் வழங்கப்படும் என அறிவிக்கப்பட்டது. இந்தத் திட்டத்துக்காக நடப்பு ஆண்டில் ரூ.755.83 கோடி நிதி ஒதுக்கப்பட்டது. முதல் கட்டமாக 1 லட்சத்து 28 ஆயிரம் தங்க மோதிரங்கள் கொள்முதல் செய்யப்பட்டன. இதையடுத்து, மதுரை ராஜாஜி அரசு மருத்துவமனையில் ‘தாய்மாமன் தங்க மோதிரம்’ திட்டத்தை முதல்-அமைச்சர் விஜய் நேற்று தொடங்கி வைத்தார். அப்போது பிறந்த குழந்தைகளுக்கு ஒரு கிராம் தங்க மோதிரத்தை அணிவித்து, குழந்தைகளை கொஞ்சி மகிழ்ந்தார். இந்நிலையில், இந்தத் திட்டம் தொடர்பாக முன்னாள் சுகாதாரத்துறை அமைச்சர் மா.சுப்பிரமணியன் எக்ஸ் தளத்தில் பதிவிட்டுள்ளார். அதில், தமிழ்ப் பெயர் சூட்டப்படும் குழந்தைகளுக்கு தங்க மோதிரம் வழங்கும் திட்டம் கடந்த 2009-ம் ஆண்டிலேயே தொடங்கப்பட்டதாக அவர் தெரிவித்துள்ளார்.
Advertisement
முத்தமிழறிஞர் கலைஞரின் 86-வது பிறந்தநாளை முன்னிட்டு, தூய தமிழ்ப் பெயர்களை ஊக்குவிக்கும் வகையில் சென்னை மாநகராட்சியால் இந்தத் திட்டம் அறிமுகப்படுத்தப்பட்டதாக அவர் குறிப்பிட்டுள்ளார். சென்னை மாநகராட்சி மகப்பேறு மருத்துவமனைகளில் பிறந்து, தமிழ்ப் பெயர் சூட்டப்படும் குழந்தைகளுக்கு ஒரு கிராம் தங்க மோதிரம் வழங்கப்பட்டதாகவும் தெரிவித்துள்ளார். தான் மேயராக இருந்த காலத்தில், அன்றைய துணை முதல்-அமைச்சர் மு.க.ஸ்டாலினால் இந்தத் திட்டம் தொடங்கி வைக்கப்பட்டதாகவும் மா.சுப்பிரமணியன் கூறியுள்ளார். தமிழ்ப் பெயர்களை ஊக்குவிப்பதுடன், அரசு மருத்துவமனைகளில் நடைபெறும் பிரசவங்களின் எண்ணிக்கையை அதிகரிக்கும் நோக்கத்திலும், சுமார் 17 ஆண்டுகளுக்கு முன்பே இந்தத் திட்டம் நடைமுறைப்படுத்தப்பட்டதாக அவர் தெரிவித்துள்ளார். மேலும், இந்தியாவிலேயே இதுபோன்ற திட்டத்தை முதன்முறையாக தொடங்கி செயல்படுத்தியது திராவிட மாடல் மாநகராட்சி நிர்வாகம் எனவும் தனது பதிவில் மா.சுப்பிரமணியன் குறிப்பிட்டுள்ளார்.
