தமிழ்நாட்டில் அதிகரித்து வரும் குற்றச் சம்பவங்களைக் கட்டுப்படுத்தி, மாநிலம் கொலைக்களமாகவும் குற்றவாளிகளின் வேட்டைக்காடாகவும் மாறுவதைத் தடுக்க வேண்டும் என திமுக தலைவர் மு.க.ஸ்டாலின் வலியுறுத்தியுள்ளார். இதுதொடர்பாக அவர் தனது எக்ஸ் தளப் பதிவில், கடந்த இரண்டு மாதங்களாக தமிழகத்தில் கொலை, கொள்ளை, பாலியல் வன்கொடுமை மற்றும் சிறுவர்கள் மாயமாகும் சம்பவங்கள் முன்னெப்போதும் இல்லாத அளவுக்கு அதிகரித்துள்ளதாகக் குறிப்பிட்டுள்ளார். இதனால் பொதுமக்கள் அச்சத்தில் இருப்பதாகவும் அவர் தெரிவித்துள்ளார். தேர்தலுக்கு முன்பே, “இது என்ன நாடா இல்லை காடா?” என விஜய் பேசியதைச் சுட்டிக்காட்டிய ஸ்டாலின், அப்போது அவர் எதிர்கால நிலைமையை முன்கூட்டியே கணித்தாரா என்ற கேள்வியையும் எழுப்பியுள்ளார். திரைப்படங்களில் விஜய்யை துப்பாக்கி ஏந்தும் கதாநாயகனாகப் பார்த்து வாக்களித்த மக்கள், தற்போது குற்றங்களைத் தடுக்கத் தவறுவதாகக் கூறி அவரை விமர்சிக்கத் தொடங்கியுள்ளதாகவும் ஸ்டாலின் தனது பதிவில் தெரிவித்துள்ளார்.
Advertisement
மேலும், கோட் சூட் அல்லது பட்டு வேட்டி சட்டை அணிந்து, கான்வாய் வாகனங்களுடன் வந்து செல்வது மட்டுமே முதலமைச்சரின் பணியல்ல என்பதை விஜய் எப்போது உணர்வார் எனவும் அவர் கேள்வி எழுப்பியுள்ளார். தமிழக வெற்றிக் கழக ஆட்சி அமைந்து ஆறு மாதங்கள் ஆகியுள்ள நிலையில், முதலமைச்சருக்கான அலுவலகம் மற்றும் இல்லத்தைத் தயார்படுத்தும் பணிகளைத் தவிர, குறிப்பிடத்தக்க வகையில் வேறு எந்தப் பணியும் நடைபெற்றதாகத் தெரியவில்லை என்றும் ஸ்டாலின் விமர்சித்துள்ளார். தனது சொகுசு வாழ்க்கைக்கு அளிக்கும் முக்கியத்துவத்தில் சிறிதளவாவது பொதுமக்கள் மற்றும் குழந்தைகளின் பாதுகாப்பிலும் முதலமைச்சர் கவனம் செலுத்த வேண்டும் என அவர் வலியுறுத்தியுள்ளார். இறுதியாக, தமிழ்நாடு கொலைக்களமாகவும் குற்றவாளிகள் சுதந்திரமாகச் செயல்படும் வேட்டைக்காடாகவும் மாறும் நிலையைத் தடுத்து நிறுத்த நடவடிக்கை எடுக்க வேண்டும் என மு.க.ஸ்டாலின் தனது பதிவில் குறிப்பிட்டுள்ளார்.
