விவசாயிகளுக்கான பயிர்க்கடன் தள்ளுபடி குறித்த அறிவிப்பை முதல்-அமைச்சர் விஜய் எப்போது வெளியிடுவார் என்று சட்டமன்ற எதிர்க்கட்சித் தலைவர் உதயநிதி ஸ்டாலின் கேள்வி எழுப்பியுள்ளார். இதுதொடர்பாக தனது எக்ஸ் வலைதளப் பக்கத்தில் அவர் வெளியிட்டுள்ள பதிவில் கூறியிருப்பதாவது: விவசாயிகளின் முழுப் பயிர்க்கடனையும் தள்ளுபடி செய்வதாக வாக்குறுதி அளித்தவர்கள், தற்போது ஆட்சிக்கு வந்த பிறகு கடன் தொகையைப் பல்வேறு நிலைகளாகப் பிரித்து, குறைந்த அளவிலான தொகையை மட்டுமே தள்ளுபடி செய்வதாக அறிவித்துள்ளனர். இதற்கு திமுக உள்ளிட்ட எதிர்க்கட்சிகளும் விவசாய அமைப்புகளும் கடும் எதிர்ப்புத் தெரிவித்தன. இதற்கிடையே, பயிர்க்கடன் தள்ளுபடியைக் கோரி விவசாயிகள் போராட்டத்தில் ஈடுபட்டபோது, தாராபுரம் மற்றும் மதுராந்தகம் இடைத்தேர்தல்கள் முடிந்ததும் அவர்களைப் பேச்சுவார்த்தைக்கு அழைப்பதாக அமைச்சர்கள் தெரிவித்தனர். ஆனால், இடைத்தேர்தல்கள் முடிந்து ஒரு மாதம் நெருங்கும் நிலையிலும் பயிர்க்கடன் தள்ளுபடி தொடர்பாக அரசு எந்த அறிவிப்பையும் வெளியிடாதது ஏன்? என உதயநிதி கேள்வி எழுப்பியுள்ளார். அரசின் தற்போதைய மௌனத்தைக் கவனிக்கும்போது, மீண்டும் குறைந்த அளவிலான கடனை மட்டுமே தள்ளுபடி செய்வதாக அறிவிக்கத் திட்டமிடப்படுகிறதோ என்ற அச்சம் விவசாயிகளிடையே எழுந்துள்ளதாகவும் அவர் குறிப்பிட்டுள்ளார்.
Advertisement
பண்டிகையைக்கூட மகிழ்ச்சியுடன் கொண்டாட முடியாத நிலையில் உள்ள விவசாயிகள், அடுத்ததாக வரும் பொங்கல் பண்டிகையையாவது நிம்மதியாகக் கொண்டாட முடியுமா என்ற கவலையில் இருப்பதாகவும் தெரிவித்துள்ளார். காவிரியில் உரிய நேரத்தில் தண்ணீர் திறந்துவிடப்படாததால் குறுவை சாகுபடி பாதிக்கப்பட்டது. இதையடுத்து, சட்டமன்றத்தில் வறட்சி நிவாரணம் வழங்க வேண்டும் என திமுக சார்பில் வலியுறுத்தியபோது, ஏற்கெனவே நிவாரணம் வழங்கப்பட்டுவிட்டதாகக் கூறி, குறுவை சிறப்புத் தொகுப்பையே வறட்சி நிவாரணமாக முதல்-அமைச்சர் விஜய் குறிப்பிட்டதாக உதயநிதி விமர்சித்துள்ளார். இந்நிலையில், தற்போதைய சூழலில் முதல்-அமைச்சர் என்ன பதில் அளிக்கப் போகிறார் என்றும் அவர் கேள்வி எழுப்பியுள்ளார். மேலும், விவசாயிகளை மீண்டும் ஏமாற்றாமல், திமுக ஆட்சிக் காலங்களில் வழங்கப்பட்டதைப் போல அனைத்து விவசாயிகளின் அனைத்துப் பயிர்க்கடன்களையும் தள்ளுபடி செய்ய வேண்டும் என உதயநிதி ஸ்டாலின் வலியுறுத்தியுள்ளார். இவ்வாறு தனது எக்ஸ் பதிவில் அவர் தெரிவித்துள்ளார்.
