தி.மு.க. முன்னாள் அமைச்சர் கே.என். நேருவுக்குச் சொந்தமான இடங்களில் லஞ்ச ஒழிப்புத்துறை போலீசார் மீண்டும் சோதனை நடத்தி வருகின்றனர். திருச்சி, சென்னை உள்ளிட்ட பகுதிகளில் மொத்தம் 25 இடங்களில் இன்று காலை முதல் இந்தச் சோதனை நடைபெற்று வருகிறது. ரூ.634 கோடி லஞ்சப் புகார் தி.மு.க. ஆட்சிக் காலத்தில் நகராட்சி நிர்வாகத் துறை அமைச்சராகப் பதவி வகித்தவர் கே.என். நேரு. இந்தத் துறையில் 2,538 பணியிடங்களை நிரப்பியதில் ரூ.634 கோடி அளவுக்கு லஞ்சப் பணம் கைமாறியதாக அமலாக்கத்துறை, தமிழக டி.ஜி.பி.க்கு கடிதம் அனுப்பியிருந்தது. இந்தக் கடிதத்தின் அடிப்படையில் வழக்குப் பதிவு செய்ய வேண்டும் என லஞ்ச ஒழிப்புத்துறைக்கு சென்னை உயர் நீதிமன்றம் உத்தரவிட்டது. இந்த உத்தரவை மறுபரிசீலனை செய்யக் கோரி கே.என். நேரு உயர் நீதிமன்றத்தில் மனு தாக்கல் செய்தார். தனது தரப்பு விளக்கத்தைக் கேட்காமல் உத்தரவு பிறப்பிக்கப்பட்டுள்ளதாக அவர் மனுவில் குறிப்பிட்டிருந்தார். இந்த மனு அண்மையில் விசாரணைக்கு வந்தபோது, அதைத் தள்ளுபடி செய்து நீதிமன்றம் உத்தரவிட்டது. அதே நேரத்தில், உத்தரவை மறுஆய்வு செய்யக் கோரிய மனுவைத் திரும்பப் பெறவும் கே.என்.
Advertisement
நேருவுக்கு அனுமதி வழங்கப்பட்டது. இதையடுத்து, உயர் நீதிமன்றத்தின் தனி நீதிபதி பிறப்பித்த உத்தரவின் அடிப்படையில் கே.என். நேருவுக்கு எதிராக வழக்குப் பதிவு செய்ய அனுமதி அளிக்கப்பட்டது. 25 இடங்களில் 2-வது கட்ட சோதனை இந்நிலையில், கே.என். நேருவின் வீடுகள் உள்ளிட்ட இடங்களில் இன்று காலை முதல் லஞ்ச ஒழிப்புத்துறை அதிகாரிகள் சோதனை மேற்கொண்டு வருகின்றனர். திருச்சி மற்றும் சென்னையில் உள்ள இடங்கள் உட்பட மொத்தம் 25 இடங்களில் இந்த நடவடிக்கை நடைபெறுகிறது. இதற்கு முன்னதாக, கடந்த செப்டம்பர் 5-ஆம் தேதி கே.என். நேருவின் வீடு உள்ளிட்ட 30-க்கும் மேற்பட்ட இடங்களில் லஞ்ச ஒழிப்புத்துறையினர் சோதனை நடத்தினர். அப்போது ஆவணங்கள் மற்றும் வங்கிப் பரிவர்த்தனை தொடர்பான விவரங்கள் கிடைத்ததாகக் கூறப்படுகிறது. அந்த விசாரணையின் தொடர்ச்சியாகவே தற்போது மீண்டும் சோதனை நடைபெறுவதாகத் தெரிவிக்கப்படுகிறது. இந்த இரண்டாம் கட்ட நடவடிக்கையில், சென்னை ராஜா அண்ணாமலைபுரத்தில் உள்ள கே.என். நேருவின் சகோதரர் ரவிச்சந்திரனின் வீட்டிலும் அதிகாரிகள் சோதனை நடத்தி வருகின்றனர்.
