சிறப்பு நீதிமன்றத்தில் ஜாமீன் மனு நிராகரிக்கப்பட்டதைத் தொடர்ந்து, முன்னாள் அமைச்சர் அன்பில் மகேஷ் பொய்யாமொழி தரப்பில் சென்னை ஐகோர்ட்டில் மேல்முறையீட்டு மனு தாக்கல் செய்யப்பட்டுள்ளது. தமிழகத்தில் கடந்த ஆட்சிக் காலத்தில் பள்ளிக்கல்வித்துறை அமைச்சராக இருந்த அன்பில் மகேஷ் பொய்யாமொழி மீது, தனியார் பள்ளிகளுக்குப் புதிய அங்கீகாரம் வழங்குவது மற்றும் ஏற்கனவே வழங்கப்பட்ட அனுமதிகளைப் புதுப்பிப்பது உள்ளிட்ட நடவடிக்கைகளில் பெருமளவில் லஞ்சம் பெறப்பட்டதாகப் புகார்கள் எழுந்தன. இதுகுறித்து லஞ்ச ஒழிப்புத்துறையினர் நடத்திய தீவிர விசாரணையில், ரூ.100 கோடிக்கும் அதிகமான பணம் முறைகேடாகப் பெறப்பட்டிருக்கலாம் என்பதற்கான ஆதாரங்கள் கிடைத்ததாகக் கூறப்படுகிறது. இதையடுத்து, கடந்த அக்டோபர் 26-ம் தேதி அன்பில் மகேஷை அதிகாரிகள் கைது செய்தனர். இந்தச் சம்பவம் அரசியல் மற்றும் கல்வித்துறை வட்டாரங்களில் பெரும் பரபரப்பை ஏற்படுத்தியது. கைது செய்யப்பட்ட அவர் நீதிமன்றத்தில் ஆஜர்படுத்தப்பட்ட பின்னர் புழல் சிறையில் அடைக்கப்பட்டார்.
Advertisement
தன் மீதான குற்றச்சாட்டுகளுக்கு அடிப்படை இல்லை என்றும், தனது உடல்நிலையைக் கருத்தில் கொண்டு ஜாமீன் வழங்க வேண்டும் என்றும் அன்பில் மகேஷ் தரப்பில் பலமுறை மனுக்கள் தாக்கல் செய்யப்பட்டன. இந்த மனுக்கள் மீதான விசாரணை முடிவடைந்து தீர்ப்பு ஒத்திவைக்கப்பட்டிருந்தது. இந்நிலையில், வழக்கின் தீவிரத்தன்மை மற்றும் விசாரணை இன்னும் முழுமையடையாததைக் காரணமாகக் குறிப்பிட்டு, சென்னை சிறப்பு நீதிமன்றம் அவரது ஜாமீன் மனுவைத் தள்ளுபடி செய்தது. இதனைத் தொடர்ந்து, ஜாமீன் கோரி அன்பில் மகேஷ் தரப்பில் சென்னை ஐகோர்ட்டில் மேல்முறையீடு செய்யப்பட்டுள்ளது. இந்த மனுவை அவசரமாக விசாரிக்க வேண்டும் என்று மூத்த வழக்கறிஞர் பி.வில்சன், நீதிபதி லட்சுமி நாராயணனிடம் கோரிக்கை விடுத்தார். இதற்கு பதிலளித்த நீதிபதி, மனுவுக்கு இன்று மதியத்திற்குள் எண்ணிடப்பட்டால் நாளை விசாரணைக்கு எடுத்துக்கொள்ளப்படும் எனத் தெரிவித்தார். இதனால், அன்பில் மகேஷின் ஜாமீன் மேல்முறையீட்டு மனு நாளை விசாரணைக்கு வரும் என எதிர்பார்க்கப்படுகிறது.
