மதுராந்தகம், தாராபுரம் தொகுதிகளுக்கு புதிய வளர்ச்சித் திட்டங்கள்: முதல்வர் விஜய் அறிவிப்பு

மதுராந்தகம் மற்றும் தாராபுரம் சட்டமன்றத் தொகுதிகளில் அண்மையில் நடைபெற்ற இடைத்தேர்தலில் தமிழக வெற்றிக் கழகம் வெற்றி பெற்றதைத் தொடர்ந்து, அப்பகுதிகளின் வளர்ச்சியை முன்னெடுக்கும் வகையில் பல்வேறு புதிய திட்டங்களை முதலமைச்சர் சி. ஜோசப் விஜய் அறிவித்துள்ளார். தாராபுரம் தொகுதியில் தமிழக வெற்றிக் கழகம் சார்பில் போட்டியிட்ட சத்தியபாமாவும், மதுராந்தகம் தொகுதியில் போட்டியிட்ட மரகதம் குமரவேலும் வெற்றி பெற்றனர். இதையடுத்து, இரு தொகுதிகளிலும் அடிப்படை வசதிகளை மேம்படுத்தவும், மக்களின் நீண்டகால கோரிக்கைகளை நிறைவேற்றவும் புதிய திட்டங்கள் அறிவிக்கப்பட்டுள்ளன. இதுகுறித்து தமிழக அரசு வெளியிட்டுள்ள செய்திக்குறிப்பில் இடம்பெற்றுள்ளமுக்கிய அறிவிப்புகள் வருமாறு: மதுராந்தகம் தொகுதிக்கான திட்டங்கள் செங்கல்பட்டு மாவட்டம், மதுராந்தகம் சட்டமன்றத் தொகுதியில் கிராமப்புற மற்றும் நகர்ப்புற பகுதிகளின் மேம்பாட்டிற்காக பல்வேறு திட்டங்கள் அறிவிக்கப்பட்டுள்ளன. நீர்வளம் மற்றும் விவசாயம் - அத்திமனம் கிராமத்தில் புக்கத்துறை மடுவின் குறுக்கே ரூ.5 கோடி செலவில் தடுப்பணை கட்டப்படும். - செம்பூண்டி ஊராட்சியில் பொதுப்பணித்துறை ஏரியின் மதகுகள் ரூ.4.50 கோடியில் சீரமைக்கப்படும். - நெல்வாய் ஊராட்சியில் மடுவைத் தூர்வாரி, கரைகளை வலுப்படுத்த ரூ.1.30 கோடி ஒதுக்கப்படும். - மதுராந்தகம் தொகுதியில் தலா ரூ.30 லட்சம் செலவில் 6 நெல் கொள்முதல் நிலையங்கள், மொத்தம் ரூ.1.80 கோடி மதிப்பில் அமைக்கப்படும். - ஆத்தூரில் 20,000 மெட்ரிக் டன் நெல்லை சேமிக்கும் வசதியுடன், ரூ.20 கோடியில் பகுதியளவு மூடப்பட்ட கிடங்கு (Semi Covered Warehouse) கட்டப்படும். - 25 ஏக்கர் நிலத்தில் ரூ.10 கோடி செலவில் மாநில விதைப் பண்ணை உருவாக்கப்படும். - பாலாற்றில் படாளம் - உதயம்பாக்கம் இடையே புதிய உயர்மட்ட தடுப்பணை அமைப்பதற்கான சாத்தியக்கூறுகள் ஆராயப்பட்டு, விரிவான திட்ட அறிக்கை தயாரிக்கப்படும். - 1984-ல் அமைக்கப்பட்ட 30 கி.மீ. நீள மதுராந்தகம் உயர்மட்டக் கால்வாய் தூர்வாரப்பட்டு, அதன் கட்டமைப்புகள் சீரமைக்கப்படும். இதன்மூலம் 30 ஏரிகளுக்கு நீர் கிடைக்கும் வகையில் நடவடிக்கை எடுக்கப்படும். கல்வி மற்றும் சமூக வசதிகள் - அச்சரப்பாக்கத்தில் ரூ.20 கோடி மதிப்பீட்டில் புதிய அரசு மகளிர் கலை மற்றும் அறிவியல் கல்லூரி அமைக்கப்படும். - புக்கத்துறை அரசு உயர்நிலைப் பள்ளி மேல்நிலைப் பள்ளியாகத் தரம் உயர்த்தப்படும். - தின்னலூர் ஊராட்சியில் ரூ.70 லட்சம் செலவில் புதிய சமுதாய நலக்கூடம் கட்டப்படும். - கருங்குழியில் ரூ.80 லட்சம் மதிப்பீட்டில் கிராமப்புற மாணவர்களுக்கான சிறிய விளையாட்டு மைதானம் அமைக்கப்படும். நகர்ப்புற மேம்பாடு மற்றும் மின்சார வசதிகள் - மதுராந்தகம் ஏரியில் சுற்றுலா மற்றும் பொழுதுபோக்கு வசதிகளுடன் பூங்கா அமைக்கப்படும். - மதுராந்தகம் நகராட்சியில் பணிபுரியும் பெண்களுக்காக புதிய தங்கும் விடுதி கட்டப்படும். - படித்த இளைஞர்களின் பயன்பாட்டிற்காக ரூ.3 கோடியில் அறிவுசார் மையம் உருவாக்கப்படும். - பொதுமக்கள் பயன்பாட்டிற்காக ரூ.4 கோடியில் வாரச்சந்தை அமைக்கப்படும். நகரில் புதிய மழைநீர் வடிகால் வசதிகளும் ஏற்படுத்தப்படும்.

- மதுராந்தகம் துணை மின் நிலையத்தில் ரூ.3 கோடி செலவில் 25 MVA திறன் கொண்ட கூடுதல் மின்மாற்றி நிறுவப்படும். - பொருளாதாரத்தில் பின்தங்கிய மற்றும் வீடற்ற குடும்பங்களுக்கு தமிழ்நாடு நகர்ப்புற வாழ்விட மேம்பாட்டு வாரியம் மூலம் அடிப்படை வசதிகளுடன் புதிய வீடுகள் கட்டி வழங்கப்படும். - செங்கல்பட்டு மாவட்டத்தின் கிராமப்புறங்களில் இருந்து விவசாயிகள் விளைபொருட்களை எடுத்துச் செல்லவும், மாணவர்கள் பள்ளி, கல்லூரிகளுக்குச் செல்வதற்கும் கூடுதல் பேருந்துகளை இயக்க நடவடிக்கை எடுக்கப்படும். தாராபுரம் தொகுதிக்கான திட்டங்கள் திருப்பூர் மாவட்டம், தாராபுரம் சட்டமன்றத் தொகுதியில் குடிநீர், வீட்டுவசதி, பாசன வசதி மற்றும் நகர்ப்புற உள்கட்டமைப்புகளை மேம்படுத்தும் வகையில் புதிய அறிவிப்புகள் வெளியிடப்பட்டுள்ளன. குடிநீர் மற்றும் பாசன வசதிகள் - திருப்பூர் மாவட்டத்தில் மொத்தமுள்ள 2,455 ஊரகக் குடியிருப்புகளில், தற்போது 1,223 பகுதிகளுக்கு காவிரி கூட்டுக் குடிநீர் வழங்கப்படுகிறது. மீதமுள்ள 1,232 குடியிருப்புகளுக்கும் காவிரி ஆற்றை ஆதாரமாகக் கொண்டு ரூ.1,439 கோடி மதிப்பீட்டில் புதிய கூட்டுக் குடிநீர்த் திட்டம் செயல்படுத்தப்படும். - இந்தத் திட்டம் தாராபுரம், காங்கேயம், குண்டடம், பொங்கலூர், வெள்ளக்கோயில் ஊராட்சி ஒன்றியங்கள், மூலனூரின் 7 ஊராட்சிகள் மற்றும் பல்லடத்தின் 17 ஊராட்சிகளில் செயல்படுத்தப்படும். - தாராபுரம், மூலனூர் மற்றும் குண்டடம் பகுதிகளில் புதிய மேல்நிலை நீர்த்தேக்கத் தொட்டிகள் அமைத்து, சுமார் 13,000 குடிநீர் இணைப்புகள் வழங்கப்படும். - திருப்பூர் மாவட்டத்தில் பாசனக் கால்வாய்களில் உள்ள மண்திட்டுகளை அகற்றி தூர்வார ரூ.10 கோடியில் 159 பணிகள் மேற்கொள்ளப்படும். - தாராபுரம் தொகுதியில் மட்டும் சுமார் 271 கி.மீ. நீளமுள்ள பாசன வாய்க்கால்கள் மற்றும் கால்வாய்களில் உள்ள மண்திட்டுகள், புதர்கள், முட்செடிகள் அகற்றப்பட்டு தூர்வாரப்படும். வீட்டுவசதி மற்றும் பொதுமக்கள் பாதுகாப்பு - தாராபுரம் தொகுதியில் வீடற்ற மக்களுக்கு 2,700 இலவச வீட்டுமனைப் பட்டாக்கள் வழங்கப்படும். - தாராபுரம் வட்டம், சின்னபுத்தூர் கிராமத்தைச் சேர்ந்த மஜரா குருவப்ப நாயக்கன் பாளையத்தில் கடந்த 20 ஆண்டுகளாக வீடுகள் கட்டி வசித்து வரும் சுமார் 87 குடும்பங்களுக்கு பட்டா வழங்க நடவடிக்கை எடுக்கப்படும். - மூலனூரில் புதிய தீயணைப்பு மற்றும் மீட்புப் பணிகள் நிலையம் அமைக்கப்படும். தாராபுரம் நகராட்சி மேம்பாடு - ரூ.6 கோடி மதிப்பீட்டில் குடிநீர் மேல்நிலை நீர்த்தேக்கத் தொட்டி மற்றும் குடிநீர் மேம்பாட்டுப் பணிகள் மேற்கொள்ளப்படும். - ரூ.40 லட்சம் செலவில் தெருவிளக்குகள் அமைக்கப்படும். - ரூ.6 கோடியில் திடக்கழிவு மேலாண்மைத் திட்டம் செயல்படுத்தப்படும். - நகரில் மழைநீர் வடிகால் வசதிகளும் மேம்படுத்தப்படும். மதுராந்தகம் மற்றும் தாராபுரம் தொகுதிகளில் அறிவிக்கப்பட்டுள்ள திட்டங்களை விரைந்து செயல்படுத்துவதற்குத் தொடர்புடைய அரசுத் துறைகளுக்கு முதலமைச்சர் அறிவுறுத்தியுள்ளதாக தமிழக அரசின் செய்திக்குறிப்பில் தெரிவிக்கப்பட்டுள்ளது.