மணிமுத்தாறு அருவியில் தொடரும் வெள்ளப்பெருக்கு: 4-வது நாளாக சுற்றுலாப் பயணிகள் குளிக்கத் தடை

திருநெல்வேலி மாவட்டம் அம்பாசமுத்திரம் அருகே அமைந்துள்ளமணிமுத்தாறு அருவியில் நீர்வரத்து தொடர்ந்து அதிகமாக இருப்பதால், சுற்றுலாப் பயணிகள் குளிப்பதற்கான தடை 4-வது நாளாக இன்றும் நீட்டிக்கப்பட்டுள்ளது. மேற்குத் தொடர்ச்சி மலைப் பகுதிகளில் பெய்து வரும் கனமழையால் மணிமுத்தாறு அருவிக்கு வரும் நீரின் அளவு அதிகரித்துள்ளது. இதனால் அருவியில் வெள்ளப்பெருக்கு ஏற்பட்டு, தண்ணீர் பெரும் வேகத்துடன் கொட்டுகிறது. இதையடுத்து, சுற்றுலாப் பயணிகளின் பாதுகாப்பைக் கருத்தில் கொண்டு வனத்துறையினர் கடந்த மூன்று நாட்களாக அருவியில் குளிக்க அனுமதி மறுத்திருந்தனர். இந்த நிலையில், வியாழக்கிழமையான இன்றும் நீர்வரத்து குறையாததால், குளிப்பதற்கான தடையை மேலும் ஒரு நாளுக்கு நீட்டிப்பதாக வனத்துறை அறிவித்துள்ளது.

அதேவேளையில், சுற்றுலாப் பயணிகள் அருவியின் இயற்கை அழகைத் தொலைவில் இருந்து ரசிக்க மட்டும் அனுமதிக்கப்படுகின்றனர். இதற்கிடையே, அருவிப் பகுதியில் வனத்துறையினர் தொடர்ந்து கண்காணிப்புப் பணிகளை மேற்கொண்டு வருகின்றனர். நீர்வரத்து இயல்பு நிலைக்குத் திரும்பிய பின்னரே சுற்றுலாப் பயணிகள் குளிக்க அனுமதிப்பது குறித்து முடிவு எடுக்கப்படும் எனத் தெரிவிக்கப்பட்டுள்ளது. தொடர்ந்து நான்கு நாட்களாக விதிக்கப்பட்டுள்ள தடையால், அருவியில் குளிப்பதற்காக வந்த சுற்றுலாப் பயணிகள் ஏமாற்றத்துடன் திரும்பிச் சென்றனர்.