மதுராந்தகம், தாராபுரம் இடைத்தேர்தல்களில் தவெக வேட்பாளர்கள் தொடர்ந்து முன்னிலை பெற்று வரும் நிலையில், மக்கள் ஆதரவுடன் திமுக, அதிமுக கட்சிகளின் கோட்டையைத் தகர்ப்போம் என அமைச்சர் விஜய் பாலாஜி தெரிவித்துள்ளார். இரு தொகுதிகளிலும் தவெக வேட்பாளர்கள் முன்னிலை வகித்து வருவதையடுத்து, சென்னை பனையூரில் உள்ள தவெக தலைமை அலுவலகத்தில் கட்சித் தொண்டர்கள் உற்சாகமாகக் கொண்டாடினர். விசில் அடித்தும், இனிப்புகளை வழங்கியும் தங்களது மகிழ்ச்சியை வெளிப்படுத்தினர். தற்போதைய வாக்கு எண்ணிக்கையில் திமுக வேட்பாளர்கள் இரண்டாவது இடத்திலும், அதிமுக வேட்பாளர்கள் மூன்றாவது இடத்திலும் உள்ளனர். இதனால் இரு தொகுதிகளிலும் தவெக தொண்டர்கள் கொண்டாட்டத்தில் ஈடுபட்டு வருகின்றனர். இந்நிலையில், ஈரோட்டில் செய்தியாளர்களைச் சந்தித்த அமைச்சர் விஜய் பாலாஜி, ஜனநாயக முறைப்படி நடைபெற்ற இடைத்தேர்தலில் இதுபோன்ற மாற்றம் ஏற்பட்டிருப்பது முதல் முறை என்று குறிப்பிட்டார்.
Advertisement
மூன்றாவது இடத்தில் இருந்த தாங்கள் தற்போது முதலிடத்துக்கு முன்னேறியுள்ளதாகவும் அவர் தெரிவித்தார். மேலும், பொய்யான பிரசாரங்களை நம்பி மக்கள் வாக்களித்ததாகவும், தற்போது திமுக, அதிமுக ஆகிய கட்சிகளைப் புறக்கணித்து தவெகவை மக்கள் ஏற்றுக்கொண்டுள்ளதாகவும் அவர் கூறினார். தாராபுரம் தொகுதியில் நகர்ப்புறப் பகுதிகளின் வாக்குகள் எண்ணப்படும்போது, மக்களின் ஆதரவுடன் திமுக, அதிமுக கட்சிகளின் செல்வாக்கை முறியடித்து தவெக முன்னிலை பெறும் என்றும் அமைச்சர் விஜய் பாலாஜி நம்பிக்கை தெரிவித்தார்.
