**தலைப்பு:** சபரிமலையில் நடைபெறவுள்ள நிறைப்புத்தரிசி பூஜையை முன்னிட்டு, கோவில் நடை இன்று (ஞாயிற்றுக்கிழமை) மாலை 5 மணிக்கு திறக்கப்படுகிறது. இருப்பினும், கேரளத்தில் தொடர்ச்சியாக பெய்து வரும் கனமழையால் பம்பை ஆற்றில் வெள்ளப்பெருக்கு ஏற்பட்டுள்ளதால், பக்தர்கள் தற்போதைக்கு சபரிமலைக்கு வருவதைத் தவிர்க்குமாறு திருவிதாங்கூர் தேவஸ்தானம் கேட்டுக்கொண்டுள்ளது.நாளை (திங்கட்கிழமை) நிறைப்புத்தரிசி பூஜை நடைபெற உள்ள நிலையில், பம்பையிலிருந்து சன்னிதானம் செல்லும் வழியில் வெள்ளம் காரணமாக கடுமையான சிரமம் ஏற்பட்டுள்ளது. இதனால் பக்தர்களின் பாதுகாப்பை கருத்தில் கொண்டு இந்த வேண்டுகோள் விடுக்கப்பட்டுள்ளதாக தெரிவிக்கப்பட்டுள்ளது.இதுகுறித்து தேவஸ்தானம் வெளியிட்டுள்ள அறிக்கையில், பம்பை ஆற்றில் ஏற்பட்டுள்ள வெள்ளப்பெருக்கால் ஆற்றைக் கடக்க இயலாத நிலை உருவாகியுள்ளது.
Advertisement
எனவே, இன்றும் நாளையும் சாமி தரிசனத்திற்காக முன்பதிவு செய்துள்ள பக்தர்கள் தங்களது சபரிமலை பயணத்தை ஒத்திவைக்குமாறு கேட்டுக்கொள்ளப்பட்டுள்ளது.மேலும், ஆவணி மாத சிறப்பு பூஜைகளை முன்னிட்டு சபரிமலை கோவில் நடை வரும் 16-ஆம் தேதி திறக்கப்படும் என்றும், 17 முதல் 21-ஆம் தேதி வரை ஐந்து நாட்கள் சிறப்பு பூஜைகள் நடைபெறும் என்றும் தெரிவிக்கப்பட்டுள்ளது.அதேபோல், ஓணம் பண்டிகையை முன்னிட்டு வரும் 24 முதல் 28-ஆம் தேதி வரை கோவில் நடை திறந்திருக்குமெனவும், அந்த நாட்களுக்கான ஆன்லைன் தரிசன முன்பதிவு தற்போது நடைபெற்று வருவதாகவும் தேவஸ்தானம் தனது அறிவிப்பில் தெரிவித்துள்ளது.
