பாகிஸ்தானுக்கு ஏற்கனவே வழங்கிய 3 பில்லியன் அமெரிக்க டாலர் (இந்திய மதிப்பில் சுமார் ரூ.25 ஆயிரம் கோடி) நிதியுதவிக்கான கால அவகாசத்தை சவுதி அரேபியா மீண்டும் நீட்டித்துள்ளது. இதனை பாகிஸ்தான் நிதி அமைச்சர் முகமது அவுரங்கசீப் தெரிவித்துள்ளார். நாடாளுமன்ற வளாகத்தில் செய்தியாளர்களிடம் பேசிய அவர், இரு நாடுகளுக்கும் இடையிலான வலுவான நட்புறவைக் கருத்தில் கொண்டு, நிதியுதவிக்கான காலக்கெடு நியாயமான அளவில் நீட்டிக்கப்பட்டுள்ளதாகக் குறிப்பிட்டார். மேலும், எவ்வளவு காலம் நீட்டிக்கப்பட்டுள்ளது என்பது குறித்து கவலைப்பட வேண்டியதில்லை என்றும் தெரிவித்தார். பாகிஸ்தான், ஐக்கிய அரபு அமீரகத்திடம் பெற்றிருந்த 3.5 பில்லியன் டாலர் கடனைத் திருப்பிச் செலுத்தியதைத் தொடர்ந்து, அதற்கு மாற்றாக கடந்த ஏப்ரல் மாதம் சவுதி அரேபியா 3 பில்லியன் டாலர் நிதியுதவி அளித்தது. ஆரம்பத்தில் மூன்று மாத காலத்திற்கு வழங்கப்பட்ட இந்த நிதியுதவியின் அவகாசம் கடந்த 31-ம் தேதியுடன் நிறைவடைந்தது. இந்நிலையில், தற்போது அதன் காலக்கெடு மீண்டும் நீட்டிக்கப்பட்டுள்ளது. இதற்கிடையே, பாகிஸ்தானின் நிதிப் பற்றாக்குறையைச் சமாளிப்பதற்காக சவுதி அரேபியா கூடுதலாக 5 பில்லியன் டாலர் நிதியுதவியும் வழங்கியுள்ளது. இந்த நிதிக்கான கால அவகாசம் 2028-ம் ஆண்டு வரை நீட்டிக்கப்பட்டுள்ளதாகவும் அவுரங்கசீப் கூறினார்.
Advertisement
மேலும், பாகிஸ்தானின் அந்நியச் செலாவணி கையிருப்பு மூன்று மாதங்களுக்கும் அதிகமான இறக்குமதிச் செலவுகளை ஈடுகட்டும் அளவுக்கு உயர்ந்துள்ளதாக அவர் தெரிவித்தார். இந்த ஆண்டின் இறுதிக்குள் நான்கு மாத இறக்குமதிச் செலவுகளைச் சமாளிக்கும் அளவுக்கு கையிருப்பை அதிகரிக்க அரசு திட்டமிட்டுள்ளது. இதனால், சவுதி அரேபியாவிடம் கூடுதல் நிதியுதவி கோரவில்லை என்றும் அவர் விளக்கினார். முன்னதாக, கடந்த ஜூலை மாதம் அமெரிக்காவிடம் 10 பில்லியன் டாலர் மதிப்பிலான நிதி வசதியை பாகிஸ்தான் கோரியிருந்தது. இது தொடர்பாகப் பேசிய நிதி அமைச்சர், சர்வதேச சந்தைகள் மூலம் நிதி திரட்டுவதற்கே பாகிஸ்தான் முன்னுரிமை அளித்ததாகக் கூறினார். இதன் ஒரு பகுதியாக, கடந்த செப்டம்பர் மாதம் 3 பில்லியன் டாலர் மதிப்பிலான கடன் பத்திரங்களை பாகிஸ்தான் வெளியிட்டது. இதற்கு முதலீட்டாளர்களிடமிருந்து 6 பில்லியன் டாலர் மதிப்பிலான முதலீட்டு ஆர்டர்கள் கிடைத்தன. அமெரிக்காவிடமிருந்து நிதியுதவி கிடைத்தால் வரவேற்பதாகவும், இல்லையெனில் யூரோ பாண்டுகள் உள்ளிட்ட மாற்று வழிகள் மூலம் நிதி திரட்டப்படும் என்றும் அவர் தெரிவித்தார். தொடர்ந்து கடுமையான பொருளாதார நெருக்கடியை எதிர்கொண்டு வரும் பாகிஸ்தான், தனது நிதிநிலையைச் சீரமைக்கவும் பொருளாதாரச் சிக்கல்களில் இருந்து மீளவும் பல்வேறு நாடுகளின் உதவியை நாடி வருகிறது.
