இஸ்ரேல் நாடாளுமன்றத் தேர்தலில் பெஞ்சமின் நெதன்யாகு தலைமையிலான கூட்டணிக்கும், முன்னாள் ராணுவத் தளபதி காடி ஐசன்கோட் தலைமையிலான கூட்டணிக்கும் இடையே கடும் போட்டி நிலவியது. தேர்தல் முடிவில் எந்தக் கூட்டணிக்கும் தனிப்பெரும்பான்மை கிடைக்காததால், ஆட்சி அமைப்பதில் இழுபறி ஏற்பட்டது. இதையடுத்து நடைபெற்ற அரசியல் பேச்சுவார்த்தைகளைத் தொடர்ந்து, ஐசன்கோட் தலைமையிலான கூட்டணிக்கு இரண்டு அரபு கட்சிகள் ஆதரவு தெரிவித்தன. இதன் மூலம் அந்தக் கூட்டணியின் பலம் 67 ஆக உயர்ந்தது. மறுபுறம், நெதன்யாகு தலைமையிலான கூட்டணிக்கு 46 இடங்களே உள்ளன. இதனால் ஐசன்கோட் தரப்பு ஆட்சியமைக்க உள்ளது. இந்தச் சூழலில், நெதன்யாகுவின் தோல்விக்கு இந்திய யூனியன் முஸ்லிம் லீக் (ஐ.யூ.எம்.எல்.) கட்சியின் இளைஞரணியினரும் ஒரு காரணம் என்று கேரள அமைச்சரும், மாநில ஐ.யூ.எம்.எல். இளைஞரணித் தலைவருமான கே.எம். ஷாஜி பேசியிருப்பது சர்ச்சையை ஏற்படுத்தியுள்ளது. கொச்சியில் நடைபெற்ற ஐ.யூ.எம்.எல். இளைஞரணி மாநாட்டில் உரையாற்றிய அவர், மலப்புரம், காசர்கோடு, எர்ணாகுளம் ஆகிய பகுதிகளைச் சேர்ந்த இளைஞரணி நிர்வாகிகளுக்கும் நெதன்யாகுவின் தோல்வியில் பங்கு இருப்பதாகக் குறிப்பிட்டார். மேலும், சமூக வலைதளங்களில் அவர்கள் முன்னெடுத்த பிரசாரங்களும், உலகின் பல்வேறு பகுதிகளில் இஸ்ரேலுக்கு எதிராக நடத்திய போராட்டங்களும் தாக்கத்தை ஏற்படுத்தியதாகக் கூறினார்.
Advertisement
இந்தச் சம்பவத்தை ஒரு பாடமாக எடுத்துக்கொள்ள வேண்டும் என்றும், உலகின் பல நாடுகளில் வலதுசாரி சக்திகள் பின்னடைவைச் சந்தித்து வருவதன் தொடர்ச்சியாக இதைப் பார்க்க வேண்டும் என்றும் அவர் தெரிவித்தார். ஷாஜியின் இந்தக் கருத்து சமூக வலைதளங்களில் விவாதத்தையும் கேலியையும் ஏற்படுத்தியுள்ளது. பலரும் அவரது பேச்சை விமர்சித்து மீம்ஸ்களையும் கிண்டல் பதிவுகளையும் வெளியிட்டு வருகின்றனர். இதில் ஒருவர், இஸ்ரேலின் புதிய பிரதமர் தனது அமைச்சரவையில் இடம்பெறுமாறு முஸ்லிம் லீக் கட்சிக்கு அழைப்பு விடுத்துள்ளதாக நகைச்சுவையாகப் பதிவிட்டுள்ளார். மற்றொருவர், ஐ.யூ.எம்.எல். மற்றும் அதன் இளைஞரணிக்கு இஸ்ரேலில் வாக்களிக்கும் உரிமை இருப்பதாகக் கிண்டல் செய்துள்ளார். அதேவேளையில், ஷாஜிக்கு ஆதரவாகவும் சிலர் கருத்து தெரிவித்து வருகின்றனர். அவர் குறிப்பிட்டது சமூக வலைதளப் பிரசாரங்கள் மற்றும் பதிவுகளின் தாக்கத்தைப் பற்றித்தான் என்றும், அவரது கருத்தில் தவறில்லை என்றும் அவர்கள் வாதிட்டு வருகின்றனர்.
