தூத்துக்குடி மாநகராட்சிக்கு உட்பட்ட 4 மண்டலங்களிலும் கடந்த அக்டோபர் மாதம் நடத்தப்பட்ட அதிரடி சோதனைகளில், 371 கிலோ தடை செய்யப்பட்ட ஒருமுறை பயன்படுத்தும் பிளாஸ்டிக் பொருட்கள் பறிமுதல் செய்யப்பட்டன. விதிமீறலில் ஈடுபட்ட வணிக நிறுவனங்களுக்கு மொத்தம் ரூ.16,200 அபராதம் விதிக்கப்பட்டுள்ளது. தடை செய்யப்பட்ட பிளாஸ்டிக் பயன்பாட்டுக்கு எதிராக நடவடிக்கை தமிழக அரசால் தடை செய்யப்பட்ட ஒருமுறை பயன்படுத்தும் பிளாஸ்டிக் பொருட்களை விற்பனை செய்வோர் மற்றும் பயன்படுத்துவோர் மீது தூத்துக்குடி மாநகராட்சி நிர்வாகம் தொடர்ந்து நடவடிக்கை எடுத்து வருகிறது. மாநகராட்சி ஆணையர் உத்தரவின் பேரில், பொது சுகாதார அலுவலர் மற்றும் சுகாதார ஆய்வாளர்கள் தலைமையில் 4 மண்டலங்களிலும் தனித்தனியாக சிறப்புக் குழுக்கள் அமைக்கப்பட்டுள்ளன. இக்குழுவினர் தினமும் கடைகள் மற்றும் வணிக நிறுவனங்களில் ஆய்வு மேற்கொண்டு வருகின்றனர். அதன்படி, 2026 அக்டோபர் 1 முதல் 31-ம் தேதி வரை மொத்தம் 104 வணிக நிறுவனங்களில் சோதனை நடத்தப்பட்டது. இதில் தடை செய்யப்பட்ட பிளாஸ்டிக் கேரி பைகள், தேநீர் கோப்பைகள் மற்றும் பிளாஸ்டிக் இலைகள் என மொத்தம் 371 கிலோ பிளாஸ்டிக் பொருட்கள் பறிமுதல் செய்யப்பட்டன. விதிகளை மீறிய நிறுவனங்களின் உரிமையாளர்களுக்கு ரூ.16,200 அபராதம் விதிக்கப்பட்டது.
Advertisement
மண்டல வாரியாக பறிமுதல் மற்றும் அபராத விவரங்கள் - வடக்கு மண்டலம்: 20 இடங்களில் ஆய்வு நடத்தி 109 கிலோ பிளாஸ்டிக் பொருட்கள் பறிமுதல் செய்யப்பட்டன. ரூ.4,000 அபராதம் விதிக்கப்பட்டது. - கிழக்கு மண்டலம்: 39 இடங்களில் சோதனை மேற்கொண்டு 167 கிலோ பிளாஸ்டிக் பொருட்கள் கைப்பற்றப்பட்டன. ரூ.5,000 அபராதம் விதிக்கப்பட்டது. - மேற்கு மண்டலம்: 31 இடங்களில் நடத்தப்பட்ட ஆய்வில் 77 கிலோ பிளாஸ்டிக் பொருட்கள் பறிமுதல் செய்யப்பட்டன. ரூ.6,200 அபராதம் விதிக்கப்பட்டது. - தெற்கு மண்டலம்: 14 இடங்களில் சோதனை நடத்தி 18 கிலோ பிளாஸ்டிக் பொருட்கள் பறிமுதல் செய்யப்பட்டன. ரூ.1,000 அபராதம் விதிக்கப்பட்டது. மாநகராட்சி ஆணையர் வேண்டுகோள் தடை செய்யப்பட்ட பிளாஸ்டிக் பொருட்களை தொடர்ந்து விற்பனை செய்வோர் மற்றும் பயன்படுத்துவோர் மீது மேலும் கடுமையான சட்ட நடவடிக்கைகள் எடுக்கப்படும் என மாநகராட்சி நிர்வாகம் எச்சரித்துள்ளது. பொதுமக்களும் வியாபாரிகளும் பிளாஸ்டிக் பயன்பாட்டைத் தவிர்த்து, மாநகராட்சி நிர்வாகத்தின் நடவடிக்கைகளுக்கு ஒத்துழைப்பு அளிக்க வேண்டும் என்றும், பிளாஸ்டிக் இல்லாத தூத்துக்குடியை உருவாக்க அனைவரும் முன்வர வேண்டும் என்றும் மாநகராட்சி ஆணையர் பிரியங்கா கேட்டுக்கொண்டுள்ளார்.
