முன்னாள் அமைச்சர் அன்பில் மகேஷ் பொய்யாமொழி கைது செய்யப்பட்டபோது, காவல் துறை அதிகாரிகளுடன் வாக்குவாதத்தில் ஈடுபட்டதாக தி.மு.க. முன்னாள் அமைச்சர் சேகர் பாபு மற்றும் நாடாளுமன்ற உறுப்பினர் கலாநிதி வீராசாமி ஆகியோர் மீது வேப்பேரி போலீசார் வழக்குப்பதிவு செய்துள்ளனர். இந்த விவகாரத்தில் மேலும் 10 பேர் மீதும் வழக்குகள் பதிவு செய்யப்பட்டுள்ளன. கடந்த தி.மு.க. ஆட்சிக் காலத்தில், தமிழகத்தில் உள்ள ஆயிரத்துக்கும் மேற்பட்ட தனியார் பள்ளிகளுக்கு நிரந்தர அங்கீகாரம் பெற்றுத் தருவது, பள்ளிகளைத் தரம் உயர்த்துவது உள்ளிட்ட அரசு அனுமதிகளைப் பெற்றுத் தருவதாகக் கூறி, ரூ.100 கோடிக்கும் அதிகமாக முறைகேடாகப் பணம் வசூலிக்கப்பட்டதாகப் புகார் எழுந்தது. இதுதொடர்பாக, அப்போதைய பள்ளிக்கல்வித் துறை அமைச்சர் அன்பில் மகேஷ் பொய்யாமொழிக்கு எதிராக சென்னை மத்திய குற்றப்பிரிவு போலீசார் வழக்குப்பதிவு செய்தனர். இந்த வழக்கின் ஒரு பகுதியாக, கடந்த செப்டம்பர் 16-ஆம் தேதி அன்பில் மகேஷுக்குச் சொந்தமான இடங்களில் மத்திய குற்றப்பிரிவு போலீசார் சோதனை நடத்தினர். இதற்கிடையே, முன்ஜாமீன் கோரி அவர் தரப்பில் சென்னை உயர் நீதிமன்றத்தில் மனு தாக்கல் செய்யப்பட்டது. மனுவை விசாரித்த நீதிபதி வி.
Advertisement
லட்சுமி நாராயணன், முன்ஜாமீன் வழங்க மறுத்து மனுவைத் தள்ளுபடி செய்தார். இதைத்தொடர்ந்து, சென்னை அமைந்தகரையில் அன்பில் மகேஷை மத்திய குற்றப்பிரிவு போலீசார் கைது செய்தனர். இந்த நடவடிக்கையின்போது, அவரது ஆதரவாளர்களும் கட்சி நிர்வாகிகளும் சம்பவ இடத்தில் திரண்டனர். அப்போது அங்கு பாதுகாப்புப் பணியில் ஈடுபட்டிருந்த காவல் துறை அதிகாரிகளுடன் சேகர் பாபு, கலாநிதி வீராசாமி உள்ளிட்டோர் வாக்குவாதத்தில் ஈடுபட்டதாகக் கூறப்படுகிறது. மேலும், போலீசாரை அவதூறாகப் பேசியதுடன், அரசு அதிகாரிகள் தங்களது பணிகளை மேற்கொள்ளத் தடையாக இருந்ததாகவும் அவர்கள் மீது குற்றச்சாட்டுகள் எழுந்தன. சம்பவத்தின்போது எடுக்கப்பட்ட காணொளிகள் மற்றும் காவல் துறை அதிகாரிகள் அளித்த புகார்களின் அடிப்படையில் விசாரணை மேற்கொள்ளப்பட்டது. இதன் தொடர்ச்சியாக, முன்னாள் அமைச்சர் சேகர் பாபு மற்றும் எம்.பி. கலாநிதி வீராசாமி ஆகியோர் மீது வேப்பேரி காவல் நிலையத்தில் வழக்குப்பதிவு செய்யப்பட்டுள்ளது. இவர்களைத் தவிர, கைது நடவடிக்கையின்போது காவல் துறையினருக்கு எதிராகச் செயல்பட்டதாக அடையாளம் காணப்பட்ட மேலும் 10 பேர் மீதும் போலீசார் வழக்குப்பதிவு செய்துள்ளனர்.
