உலக மல்யுத்த சாம்பியன்ஷிப் தொடரில் இந்திய வீராங்கனைகளான காஜல் தோசக், நீலம் சிரோஹி ஆகிய இருவரும் இறுதிப்போட்டிக்கு தகுதி பெற்று சாதனை படைத்துள்ளனர். ஒரே சீனியர் உலக சாம்பியன்ஷிப் தொடரில் இரண்டு இந்திய வீராங்கனைகள் தங்கப் பதக்கத்துக்கான போட்டியில் களமிறங்குவது இதுவே முதல்முறையாகும். தங்கத்துக்காக மோதும் இந்திய வீராங்கனைகள் 76 கிலோ எடைப்பிரிவில் இறுதிப்போட்டிக்கு முன்னேறியுள்ள காஜல் தோசக், உக்ரைன் வீராங்கனை அனஸ்டாசியா அல்பியேவாவை எதிர்கொள்கிறார். 50 கிலோ எடைப்பிரிவில் களமிறங்கும் நீலம் சிரோஹி, ஜப்பானின் யுய் சுசாகியுடன் பலப்பரீட்சை நடத்துகிறார். பின்னடைவிலிருந்து மீண்டு வென்ற காஜல் 18 வயதான காஜல், 20 வயதுக்குட்பட்டோருக்கான உலக சாம்பியன்ஷிப் போட்டியில் ஏற்கெனவே இருமுறை சாம்பியன் பட்டம் வென்றுள்ளார். தற்போது சீனியர் பிரிவில் தனது முதல் தொடரிலேயே இறுதிப்போட்டியை எட்டியிருப்பது அவரது திறமையை வெளிப்படுத்தியுள்ளது. அரையிறுதியில் கிர்கிஸ்தானின் ஐபெரி மெடெட் கிசியை எதிர்கொண்ட காஜல், ஒரு கட்டத்தில் 1-7 என்ற புள்ளிக் கணக்கில் பின்தங்கினார். எனினும், மனம் தளராமல் போராடிய அவர், தொடர்ந்து புள்ளிகளைக் குவித்து 10-7 என்ற கணக்கில் வெற்றி பெற்றார். இதன் மூலம் தங்கப் பதக்கத்துக்கான இறுதிப்போட்டியில் தனது இடத்தை உறுதி செய்தார். இதற்கு முன்பு நடைபெற்ற சுற்றுகளில் லிதுவேனியாவின் கமிலே கிரிஸ்கீனே கவுகைட், மங்கோலியாவின் தவானசன் என்க் அமர் ஆகியோரையும் காஜல் வீழ்த்தியிருந்தார்.
Advertisement
நீலத்துக்கு காத்திருக்கும் கடும் சவால் 26 வயதான நீலம் சிரோஹி, 50 கிலோ எடைப்பிரிவு அரையிறுதியில் கஜகஸ்தானின் செய்னெப் பயானோவாவை 7-3 என்ற புள்ளிக் கணக்கில் தோற்கடித்து இறுதிப்போட்டிக்கு முன்னேறினார். இதற்கு முன்னதாக நடைபெற்ற காலிறுதிப் போட்டியில் ரஷ்ய வீராங்கனை எலிசவேதா ஸ்மிர்னோவா காயம் காரணமாக விலகியதால், நீலம் அரையிறுதிக்கு முன்னேறும் வாய்ப்பைப் பெற்றார். இறுதிப்போட்டியில் அவர் ஜப்பானின் யுய் சுசாகியைச் சந்திக்க உள்ளார். ஏற்கெனவே நான்கு முறை உலக சாம்பியன் பட்டம் வென்றுள்ள சுசாகியை வீழ்த்துவது நீலத்துக்கு கடினமான சவாலாக இருக்கும். இந்திய மகளிர் மல்யுத்தத்தில் புதிய மைல்கல் கடந்த 2021-ம் ஆண்டு உலக மல்யுத்த சாம்பியன்ஷிப்பில் இந்திய வீராங்கனை அன்ஷு மாலிக் இறுதிப்போட்டிக்கு முன்னேறி வெள்ளிப் பதக்கம் வென்றிருந்தார். இருப்பினும், சீனியர் உலக சாம்பியன்ஷிப் போட்டியில் இந்திய வீராங்கனைகள் இதுவரை தங்கப் பதக்கத்தை வென்றதில்லை. இத்தகைய சூழலில், ஒரே தொடரில் காஜல் தோசக் மற்றும் நீலம் சிரோஹி ஆகிய இருவரும் இறுதிப்போட்டியை எட்டியிருப்பது இந்திய மகளிர் மல்யுத்தத்துக்கு குறிப்பிடத்தக்க சாதனையாக அமைந்துள்ளது. இருவரும் தங்களது இறுதிப்போட்டிகளில் வெற்றி பெற்றால், சீனியர் உலக மல்யுத்த சாம்பியன்ஷிப்பில் இந்திய மகளிருக்கு முதல் தங்கப் பதக்கம் கிடைக்கும் என்ற எதிர்பார்ப்பு உருவாகியுள்ளது.
