ஜெர்மனியில் நடைபெற்று வரும் ஹைலோ ஓபன் சூப்பர் 500 பேட்மிண்டன் போட்டியில் இந்தியாவின் பி.வி.சிந்து மற்றும் லக்சயா சென் ஆகியோர் தங்களது ஆட்டங்களில் வெற்றி பெற்று காலிறுதிச் சுற்றுக்கு தகுதி பெற்றுள்ளனர். ஆண்கள் ஒற்றையர் பிரிவில் நடைபெற்ற 2-வது சுற்றுப் போட்டியில் இந்திய வீரர் லக்சயா சென், தனது சகநாட்டு வீரரான கிரண் ஜார்ஜை எதிர்கொண்டார். இருவருக்கும் இடையே கடும் போட்டி நிலவிய இந்த ஆட்டத்தில் லக்சயா சென் 21-15, 18-21, 21-12 என்ற செட் கணக்கில் வெற்றி பெற்றார். முதல் செட்டை லக்சயா சென் கைப்பற்றிய நிலையில், இரண்டாவது செட்டில் சிறப்பாக விளையாடிய கிரண் ஜார்ஜ் வெற்றி பெற்று ஆட்டத்தை சமன் செய்தார். இதையடுத்து நடைபெற்ற தீர்மானிக்கும் மூன்றாவது செட்டில் ஆதிக்கம் செலுத்திய லக்சயா சென் வெற்றியைத் தனதாக்கி காலிறுதிக்குள் நுழைந்தார்.
Advertisement
அடுத்ததாக நடைபெறும் காலிறுதியில் பின்லாந்து வீரர் காலே கோல்ஜோனனை அவர் எதிர்கொள்ள உள்ளார். பெண்கள் ஒற்றையர் பிரிவின் 2-வது சுற்றில் இந்தியாவின் பி.வி.சிந்து, பிரான்ஸ் வீராங்கனை ரோஸி ஒக்டாவியா பன்கசாரியுடன் மோதினார். இந்தப் போட்டியில் ஆரம்பம் முதலே சிறப்பான ஆட்டத்தை வெளிப்படுத்திய சிந்து, 21-9, 21-6 என்ற நேர் செட் கணக்கில் எளிதாக வெற்றி பெற்றார். இதன் மூலம் பி.வி.சிந்துவும் காலிறுதிக்கு முன்னேறியுள்ளார். காலிறுதிப் போட்டியில் அவர் டென்மார்க் வீராங்கனை அமலி ஷூல்ஸை எதிர்கொள்ள இருக்கிறார்.
