புதுடெல்லி விமான நிலையத்தில், பேங்காக்கில் இருந்து கடத்தி வரப்பட்ட 148.67 கிலோ ஹைட்ரோபோனிக் கஞ்சாவை சுங்கத்துறை அதிகாரிகள் பறிமுதல் செய்துள்ளனர். இந்தியச் சந்தையில் இதன் மதிப்பு சுமார் ரூ.150 கோடி எனக் கணக்கிடப்பட்டுள்ளது. இந்தக் கடத்தல் சம்பவம் தொடர்பாக ஒருவரை அதிகாரிகள் கைது செய்துள்ளனர். டெல்லி விமான நிலையத்தின் சரக்கு இறக்குமதிப் பிரிவில் பணியாற்றும் சிறப்பு விசாரணை மற்றும் புலனாய்வுப் பிரிவு சுங்க அதிகாரிகளுக்கு, பேங்காக்கில் இருந்து வரும் குறிப்பிட்ட சரக்கு குறித்து ரகசியத் தகவல் கிடைத்தது. இதையடுத்து, அந்தச் சரக்கை அதிகாரிகள் தீவிரமாகக் கண்காணித்தனர். பின்னர், இறக்குமதியாளரின் பிரதிநிதி முன்னிலையில் சரக்குப் பெட்டிகளைப் பிரித்து சோதனை நடத்தினர். அப்போது, 15 அட்டைப்பெட்டிகளில் வைக்கப்பட்டிருந்த பாலியூரித்தேன் குழாய்களின் சுருள்களை அதிகாரிகள் ஆய்வு செய்தனர். குழாய்களை வெட்டிச் சோதனையிட்டபோது, அவற்றுக்குள் பச்சை நிறப் பொட்டலங்களில் போதைப்பொருள் மறைத்து வைக்கப்பட்டிருந்தது கண்டுபிடிக்கப்பட்டது.
Advertisement
முதற்கட்ட ஆய்வில், மண்ணைப் பயன்படுத்தாமல் நீர் மூலம் தாவரங்களை வளர்க்கும் ஹைட்ரோபோனிக் முறையில் உற்பத்தி செய்யப்பட்ட கஞ்சா என்பது தெரியவந்தது. மொத்தம் 120 சுருள்களுக்குள் மறைத்து வைக்கப்பட்டிருந்த 148.67 கிலோ கஞ்சாவை அதிகாரிகள் கைப்பற்றினர். பறிமுதல் செய்யப்பட்ட போதைப்பொருளின் சர்வதேச சந்தை மதிப்பு சுமார் ரூ.52 கோடி எனக் கூறப்படுகிறது. அதேவேளையில், இந்தியச் சந்தையில் இதன் மதிப்பு சுமார் ரூ.150 கோடி இருக்கும் என சுங்கத்துறை அதிகாரிகள் தெரிவித்துள்ளனர். இந்தக் கடத்தல் தொடர்பாக மேற்கொள்ளப்பட்ட விசாரணையைத் தொடர்ந்து, இதில் தொடர்புடைய ஒருவர் கைது செய்யப்பட்டார். பின்னர், அவர் குற்றவியல் நீதிபதி முன்னிலையில் ஆஜர்படுத்தப்பட்டார். இந்தச் சம்பவம் குறித்து சுங்கத்துறை அதிகாரிகள் தொடர்ந்து விசாரணை மேற்கொண்டு வருகின்றனர்.
