இமாச்சலப் பிரதேச மாநிலம் சிம்லாவில், ஓய்வூதியதாரர் ஒருவரிடம் இருந்து ரூ.81,800 பணத்தைப் பறித்துச் சென்ற குரங்கு, மரத்தின் உச்சியில் அமர்ந்து ரூபாய் நோட்டுகளை மலைச்சரிவில் வீசிய சம்பவம் பெரும் பரபரப்பை ஏற்படுத்தியுள்ளது. சிம்லா மாவட்ட ஆட்சியர் அலுவலகம் அருகே கடந்த வியாழக்கிழமை இந்தச் சம்பவம் நடைபெற்றுள்ளது. முதியவர் ஒருவர் தனது ஓய்வூதியத் தொகையான ரூ.81,800-ஐ வங்கியில் செலுத்துவதற்காக எடுத்துச் சென்றுகொண்டிருந்தார். அப்போது திடீரென அங்கு வந்த குரங்கு, அவர் வைத்திருந்த பணப்பையைப் பறித்துக்கொண்டு வேகமாக ஓடியது. அருகில் இருந்த உயரமான மரத்தின் உச்சிக்குச் சென்ற குரங்கு, பையில் இருந்த பணக்கட்டைப் பிரித்து அதிலிருந்த ரூ.500 நோட்டுகளை ஒவ்வொன்றாக மலைச்சரிவில் வீசியது. மரத்தின் உயரத்திலிருந்து ரூபாய் நோட்டுகள் கீழே விழுவதைக் கண்ட அப்பகுதி மக்கள் மற்றும் அலுவலக ஊழியர்கள் அதிர்ச்சியடைந்தனர்.
Advertisement
இதற்கிடையே, பணத்தைப் பறிகொடுத்த முதியவரின் கூக்குரலைக் கேட்ட ஊழியர்களும் பொதுமக்களும் உடனடியாக உதவிக்கு வந்தனர். மலைச்சரிவின் பல்வேறு பகுதிகளில் சிதறிக் கிடந்த ரூபாய் நோட்டுகளைத் தேடிச் சேகரித்தனர். அவர்களின் முயற்சியால் பெரும்பாலான பணம் மீட்கப்பட்டு முதியவரிடம் ஒப்படைக்கப்பட்டது. இருப்பினும், குரங்கு சில ரூ.500 நோட்டுகளைக் கிழித்துச் சேதப்படுத்தியதுடன், சில நோட்டுகள் காற்றில் பறந்து காணாமல் போயின. இதனால் முதியவருக்கு சுமார் ரூ.1,500 இழப்பு ஏற்பட்டுள்ளது. சிம்லா நகரில் குரங்குகளின் தொல்லை தொடர்ந்து அதிகரித்து வருவதாகக் கவலை தெரிவிக்கும் பொதுமக்கள், அவற்றின் அட்டகாசத்தைக் கட்டுப்படுத்த அதிகாரிகள் உரிய நடவடிக்கை எடுக்க வேண்டும் என வலியுறுத்தியுள்ளனர்.
