ஈரோடு மாவட்டம் கோபிசெட்டிப்பாளையம் அருகே விவசாயத் தோட்டத்தில் வேலை செய்து கொண்டிருந்த 16 வயது சிறுவன், அறுந்து கிடந்த உயர் அழுத்த மின்சாரக் கம்பியை மிதித்ததில் மின்சாரம் தாக்கி உயிரிழந்த சம்பவம் சோகத்தை ஏற்படுத்தியுள்ளது. கோபிசெட்டிப்பாளையம் அருகே உள்ள பகுதியைச் சேர்ந்தவர் மனோஜ் (16). இவர் இன்று (புதன்கிழமை) ஈஸ்வரமூர்த்தி என்பவருக்குச் சொந்தமான விவசாயத் தோட்டத்தில் வேலை செய்து கொண்டிருந்தார். அப்போது, தோட்டத்தில் அறுந்து கீழே கிடந்த உயர் அழுத்த மின்சாரக் கம்பியை எதிர்பாராதவிதமாக மனோஜ் மிதித்ததாக கூறப்படுகிறது. இதில், அடுத்த சில நொடிகளில் அவரை மின்சாரம் தாக்கி தூக்கி வீசியது. உடலில் தீக்காயங்களுடன் மயங்கிக் கிடந்த மனோஜை, தோட்டத்தில் இருந்தவர்கள் மீட்டு அருகிலுள்ள அரசு மருத்துவமனைக்கு கொண்டு சென்றனர்.
Advertisement
அங்கு சிறுவனை பரிசோதித்த மருத்துவர்கள், அவர் ஏற்கனவே உயிரிழந்துவிட்டதாக தெரிவித்தனர். இதுகுறித்து தகவல் கிடைத்ததும் சம்பவ இடத்துக்கு சென்ற உள்ளூர் போலீசார், சிறுவனின் உடலை மீட்டு பிரேதப் பரிசோதனைக்காக அனுப்பி வைத்தனர். மேலும், சம்பவம் தொடர்பாக வழக்குப்பதிவு செய்து விசாரணை நடத்தி வருகின்றனர். விவசாயத் தோட்டத்தில் மின்கம்பி அறுந்து கிடந்தது குறித்து மின்வாரியத்துக்கு ஏற்கனவே தகவல் அளிக்கப்பட்டிருந்ததா அல்லது எதிர்பாராத வகையில் மின்கம்பி அறுந்து விழுந்ததா என்பது உள்ளிட்ட கோணங்களிலும் போலீசார் விசாரணை மேற்கொண்டு வருகின்றனர். தோட்ட வேலைக்குச் சென்ற 16 வயது சிறுவன் மின்சாரம் தாக்கி உயிரிழந்த சம்பவம் அப்பகுதி மக்களிடையே சோகத்தை ஏற்படுத்தியுள்ளது.
