காரைக்காலில் உள்ள ஓட்டல் ஒன்றின் ரகசிய அறையில் வைக்கப்பட்டிருந்த குளிர்சாதனப் பெட்டிகளில் இருந்து ரத்தம் போன்ற திரவம் வெளியேறியதுடன், கடும் துர்நாற்றமும் வீசியது. இதையடுத்து உணவுப் பாதுகாப்புத் துறை அதிகாரிகள் நடத்திய சோதனையில், 100 கிலோவுக்கும் அதிகமான அழுகிய இறைச்சி பறிமுதல் செய்யப்பட்டது. காரைக்கால் பகுதியில் உள்ள சில ஓட்டல்களில் தரமற்ற மற்றும் கெட்டுப்போன உணவுப் பொருட்கள் விற்பனை செய்யப்படுவதாக அதிகாரிகளுக்கு தகவல் கிடைத்தது. இதன் அடிப்படையில், காரைக்கால் துணை கலெக்டர் பூஜா தலைமையில் உணவுப் பாதுகாப்புத் துறை அதிகாரிகள் இன்று (செவ்வாய்க்கிழமை) காலை பல்வேறு ஓட்டல்களில் திடீர் ஆய்வு மேற்கொண்டனர். அப்போது குறிப்பிட்ட ஓட்டல் ஒன்றில் சோதனை நடத்தியபோது, தனி அறையிலிருந்து ரத்தம் போன்ற திரவம் வெளியேறுவது அதிகாரிகளின் கவனத்திற்கு வந்தது. சந்தேகமடைந்த அதிகாரிகள் அந்த அறைக்குள் சென்று அங்கிருந்த இரண்டு பெரிய குளிர்சாதனப் பெட்டிகளைத் திறந்து பார்த்தனர். அப்போது கடும் துர்நாற்றம் வீசியது. தொடர்ந்து நடத்தப்பட்ட ஆய்வில், அந்தப் பெட்டிகளில் பல மாதங்களாக சேமித்து வைக்கப்பட்டிருந்த கோழி மற்றும் ஆட்டு இறைச்சிகள் அழுகிய நிலையில் இருந்தது தெரியவந்தது.
Advertisement
மேலும், இறைச்சிகளில் புழுக்கள் காணப்பட்டதுடன், அவற்றில் இருந்து வெளியேறிய திரவமே அறைக்கு வெளியிலும் கசிந்திருப்பது தெரியவந்தது. இதையடுத்து அந்த ஓட்டலில் இருந்து சுமார் 50 கிலோ அழுகிய இறைச்சியை அதிகாரிகள் பறிமுதல் செய்தனர். இதேபோல், நகரின் பிற பகுதிகளிலும் நடைபெற்ற சோதனைகளில் கிடைத்தவற்றையும் சேர்த்து 100 கிலோவுக்கும் அதிகமான கெட்டுப்போன இறைச்சி கைப்பற்றப்பட்டது. சுகாதாரமற்ற முறையில் அழுகிய இறைச்சியை பதுக்கி வைத்து, அதை உணவு தயாரிக்க பயன்படுத்த முயன்றதாகக் கூறப்படும் ஓட்டல் நிர்வாகம் குறித்து அதிகாரிகள் தீவிர விசாரணை நடத்தி வருகின்றனர். விதிமுறைகளை மீறும் உணவகங்களுக்கு கடும் அபராதம் விதிக்கப்படும் என்றும், தேவையான நடவடிக்கையாக உணவகங்களுக்கு சீல் வைக்கப்படும் என்றும் துணை கலெக்டர் எச்சரிக்கை விடுத்துள்ளார். இந்த சம்பவம் காரைக்கால் பகுதியில் பரபரப்பை ஏற்படுத்தியுள்ளது.
