சென்னை காசிமேடு மீன்பிடித் துறைமுகத்தில் நிறுத்தி வைக்கப்பட்டிருந்த விசைப்படகு ஒன்றில் புதன்கிழமையான இன்று திடீரென தீப்பற்றியது. படகில் இருந்த எரிவாயு சிலிண்டர் வெடித்துச் சிதறியதால் அப்பகுதியில் பரபரப்பும் அச்சமும் ஏற்பட்டது. சென்னை காசிமேடு மீன்பிடித் துறைமுகத்தில் ஏராளமான விசைப்படகுகள் நிறுத்தி வைக்கப்பட்டிருந்தன. மீனவர்களும் பொதுமக்களும் வழக்கம்போல் துறைமுகப் பகுதியில் நடமாடிக் கொண்டிருந்தபோது, அங்கிருந்த ஒரு விசைப்படகில் திடீரென தீ பரவத் தொடங்கியது. தீயின் வெப்பம் அதிகரித்த நிலையில், படகில் இருந்த எரிவாயு சிலிண்டர் பலத்த சத்தத்துடன் வெடித்ததாகக் கூறப்படுகிறது. எதிர்பாராத இந்த வெடிப்புச் சத்தத்தைக் கேட்டு அதிர்ச்சியடைந்த மீனவர்களும் பொதுமக்களும் பீதியடைந்து அங்கிருந்து விலகி ஓடினர். நங்கூரமிட்டு நிறுத்தப்பட்டிருந்த படகில் பற்றிய தீ, சிறிது நேரத்திலேயே வேகமாகப் பரவி படகு முழுவதும் எரியத் தொடங்கியது.
Advertisement
சிலிண்டர் வெடித்ததில் படகின் சில பகுதிகளும் சேதமடைந்தன. தீ கொழுந்துவிட்டு எரிந்ததால் துறைமுகப் பகுதியில் பதற்றமான சூழல் நிலவியது. தகவலறிந்து சம்பவ இடத்திற்கு விரைந்து வந்த தீயணைப்பு மற்றும் மீட்புப் படையினர், தீயைக் கட்டுப்படுத்தும் பணியில் ஈடுபட்டனர். தீயை அணைக்க அவர்கள் மேற்கொண்ட தீவிர முயற்சிக்குப் பின்னர், படகில் ஏற்பட்ட தீ முழுமையாக அணைக்கப்பட்டது. இந்த விபத்துக்கான காரணம் குறித்து முதற்கட்ட விசாரணை நடைபெற்று வருகிறது. படகில் ஏற்பட்ட மின் கசிவு அல்லது எரிவாயு சிலிண்டர் வெடித்தது விபத்துக்குக் காரணமாக இருக்கலாம் எனச் சந்தேகிக்கப்படுகிறது. இதுகுறித்து உள்ளூர் போலீசார் தொடர்ந்து விசாரணை நடத்தி வருகின்றனர்.
