தமிழகத்தில் அதிகரித்து வரும் கொலை மற்றும் வன்முறைச் சம்பவங்கள் பொதுமக்களிடையே அச்சத்தையும் அதிர்ச்சியையும் ஏற்படுத்தியுள்ளன. குறிப்பாக, ஒரே நாளில் காவலர் ஒருவர் உட்பட 9 பேர் கொல்லப்பட்டதாக வெளியாகியுள்ள தகவல் கவலை அளிப்பதாகத் தெரிவித்துள்ள தேமுதிக பொதுச்செயலாளர் பிரேமலதா, மாநிலத்தின் சட்டம்–ஒழுங்கு நிலை குறித்து முதல்வர் விஜய் வெளிப்படையாக விளக்கமளிக்க வேண்டும் என்று வலியுறுத்தியுள்ளார். இதுகுறித்து அவர் வெளியிட்ட அறிக்கையில் கூறியிருப்பதாவது: தமிழகத்தின் பல்வேறு பகுதிகளில் தொடர்ந்து நடைபெற்று வரும் கொலை மற்றும் வன்முறைச் சம்பவங்கள் வேதனையளிக்கின்றன. ஒரே நாளில் காவலர் உட்பட 9 பேர் உயிரிழந்ததாக வெளியாகியுள்ள செய்திகள் மிகுந்த கவலையை ஏற்படுத்தியுள்ளன. இந்தச் சம்பவங்கள் தொடர்பான அனைத்து விவரங்களையும் தமிழக அரசு தாமதமின்றி மக்களுக்குத் தெரிவிக்க வேண்டும். காவல்துறை உதவி ஆய்வாளர் உயிரிழந்த சம்பவத்தில், அவரது குடும்பத்திற்கு ரூ.40 லட்சம் நிவாரணம் வழங்கப்படும் என அரசு அறிவித்துள்ளது. ஆனால், ஒரு மனித உயிரின் மதிப்பை ரூ.40 லட்சம் எனக் கருத முடியுமா என்ற கேள்வி எழுகிறது. உயிரிழந்தவர்களின் குடும்பங்களுக்கு நிதியுதவி அளிப்பதுடன் அரசின் பொறுப்பு முடிந்துவிடுவதில்லை. இத்தகைய துயரங்கள் மீண்டும் ஏற்படாத வகையில் தடுப்பு நடவடிக்கைகளை மேற்கொள்வதே அரசின் முக்கியக் கடமையாகும்.
Advertisement
சிறைகளில் இருந்து கைதிகள் தப்பிச் செல்லும் சம்பவங்களும், காவல்துறையினரே வன்முறையில் உயிரிழக்கும் நிலையும் தமிழகத்தின் பாதுகாப்பு மற்றும் சட்டம்–ஒழுங்கு நிர்வாகம் குறித்து பல்வேறு சந்தேகங்களை உருவாக்குகின்றன. பொதுமக்களின் உயிரையும் காவலர்களின் பாதுகாப்பையும் உறுதிப்படுத்த வேண்டியது அரசின் தலையாய பொறுப்பாகும். குற்றச்செயல்களைத் தடுக்க வெறும் அறிவிப்புகளை வெளியிடுவதும், ஆலோசனைக் கூட்டங்களை நடத்துவதும் மட்டும் தீர்வாகாது. கொலைச் சம்பவங்கள் நிகழாமல் தடுக்க உரிய நடவடிக்கைகளை உடனடியாக மேற்கொள்வதுடன், குற்றங்களில் ஈடுபடுவோர் மீது கடுமையான சட்ட நடவடிக்கையும் எடுக்கப்பட வேண்டும். மாநிலத்தில் தற்போது நிலவும் சட்டம்–ஒழுங்கு நிலை குறித்து முதல்வர் விஜய் பொதுமக்களுக்கு விளக்கமளிக்க வேண்டும். உயிரிழந்தவர்களின் குடும்பத்தினருக்கு எனது ஆழ்ந்த இரங்கலைத் தெரிவித்துக்கொள்கிறேன். பாதிக்கப்பட்ட குடும்பங்களுக்கு உரிய நிவாரணம் வழங்குவதோடு, எதிர்காலத்தில் இதுபோன்ற சம்பவங்கள் நிகழாத வகையில் தமிழக அரசு உறுதியான நடவடிக்கைகளை எடுக்க வேண்டும். மக்களின் உயிரிழப்புகளுக்குப் பிறகு வழங்கப்படும் நிவாரணத் தொகை அவர்களின் உயிருக்கு ஈடாகாது. மக்களின் பாதுகாப்பை உறுதி செய்து, அவர்களின் உயிரைக் காப்பதே அரசின் முதன்மையான கடமை என்று பிரேமலதா தனது அறிக்கையில் குறிப்பிட்டுள்ளார்.
