இந்தியன் சூப்பர் லீக் (ஐ.எஸ்.எல்.) 2026-27 கால்பந்து தொடரில் கேரளா பிளாஸ்டர்ஸ் எப்.சி. - மும்பை சிட்டி எப்.சி. அணிகளுக்கு இடையிலான போட்டி கோலின்றி டிராவில் முடிவடைந்தது. கொச்சியில் உள்ள ஜவஹர்லால் நேரு மைதானத்தில் நேற்று நடைபெற்ற இந்த ஆட்டத்தைக் காண ஏராளமான ரசிகர்கள் குவிந்திருந்தனர். இரு அணிகளும் வெற்றியைப் பெறும் முனைப்புடன் களமிறங்கியதால், தொடக்கம் முதலே ஆட்டம் விறுவிறுப்பாக அமைந்தது. இரு தரப்பினரும் கோல் அடிக்க பல்வேறு முயற்சிகளை மேற்கொண்டபோதிலும், முதல் பாதியில் எந்த அணிக்கும் கோல் கிடைக்கவில்லை. தொடர்ந்து நடைபெற்ற இரண்டாவது பாதியிலும் கோல் அடிக்கும் முயற்சிகள் தீவிரமடைந்தன. ஆட்டத்தின் 52-வது நிமிடத்தில் மும்பை சிட்டி வீரர் ஆகாஷ் மிஷ்ரா தலையால் அடித்த பந்து கோல் கம்பத்தில் பட்டு வெளியேறியது.
Advertisement
இதனால் மும்பை அணிக்கு கிடைத்த முக்கியமான வாய்ப்பு கோலாக மாறவில்லை. இதையடுத்து இரு அணிகளும் வீரர்களை மாற்றி ஆட்டத்தின் வேகத்தை அதிகரிக்க முயன்றன. இறுதிக்கட்டம் வரை கோல் அடிப்பதற்கான போராட்டம் நீடித்தாலும், இரு அணிகளின் முயற்சிகளுக்கும் பலன் கிடைக்கவில்லை. இதனால் போட்டி 0-0 என்ற கோல் கணக்கில் நிறைவடைந்தது. இரு அணிகளுக்கும் தலா ஒரு புள்ளி வழங்கப்பட்டது. மூன்று போட்டிகளில் தலா ஒரு வெற்றி, ஒரு டிரா, ஒரு தோல்வியைப் பதிவு செய்துள்ள கேரளா பிளாஸ்டர்ஸ் அணி 4 புள்ளிகளுடன் உள்ளது. மறுபுறம், மூன்று ஆட்டங்களில் ஒரு தோல்வி, இரண்டு டிராக்களைச் சந்தித்துள்ள மும்பை சிட்டி அணி 2 புள்ளிகளைப் பெற்றுள்ளது.
