ஈரோடு மாவட்டத்தில் பள்ளி முடிந்து டியூஷனுக்குச் சென்றுவிட்டு வீடு திரும்பாத இரண்டு மாணவர்களை, சுமார் 10 மணி நேரத் தேடுதலுக்குப் பிறகு போலீசார் தஞ்சாவூரில் மீட்டுள்ளனர். ஈரோடு மாவட்டம் சித்தோடு அருகே உள்ள நசியனூர் பள்ளியில் ஸ்ரீதர், லட்சுமணன் ஆகிய இருவரும் 9-ம் வகுப்பு படித்து வருகின்றனர். இந்நிலையில், நேற்று பள்ளி முடிந்ததும் இருவரும் டியூஷனுக்குச் சென்றுள்ளனர். ஆனால், நீண்ட நேரமாகியும் அவர்கள் வீடு திரும்பவில்லை. இதனால் கவலையடைந்த பெற்றோர், பல்வேறு இடங்களில் மாணவர்களைத் தேடியுள்ளனர். இருப்பினும், அவர்கள் குறித்த எந்தத் தகவலும் கிடைக்காததால், சித்தோடு காவல் நிலையத்தில் புகார் அளித்தனர்.
Advertisement
இதையடுத்து போலீசார் வழக்கை விசாரித்து, மாணவர்களைத் தேடும் பணியில் ஈடுபட்டனர். சுமார் 10 மணி நேரத் தேடுதலுக்குப் பிறகு, இரண்டு மாணவர்களும் தஞ்சாவூரில் இருப்பது கண்டறியப்பட்டு, போலீசாரால் மீட்கப்பட்டனர். அவர்களிடம் நடத்தப்பட்ட முதற்கட்ட விசாரணையில், படிப்பில் ஆர்வம் இல்லாததால் வேலை தேடித் தஞ்சாவூருக்குச் சென்றதாகத் தெரிவித்துள்ளனர். இதனைத் தொடர்ந்து, மாணவர்களுக்கு போலீசார் அறிவுரைகளை வழங்கி, அவர்களின் பெற்றோரிடம் ஒப்படைத்தனர்.
