இந்திய சுதந்திரப் போராட்டத்தில் தமிழ்நாட்டின் பங்கு மகத்தானது: முதல்-அமைச்சர் விஜய் வாழ்த்து

80-வது சுதந்திர தினம் நாடு முழுவதும் இன்று உற்சாகமாகக் கொண்டாடப்பட்டு வருகிறது. இந்தச் சூழலில், முதல்-அமைச்சர் ஜோசப் விஜய் சுதந்திர தின வாழ்த்துச் செய்தியை வெளியிட்டுள்ளார்.அவர் வெளியிட்டுள்ள பதிவில், நாட்டின் விடுதலைக்காக உயிர்தியாகம் செய்த எண்ணற்ற வீரர்களையும், ஆங்கிலேய ஆட்சியின் அடக்குமுறையை எதிர்த்து துணிச்சலுடன் போராடிய தேசியத் தலைவர்களையும் இந்த நாளில் நன்றியுடன் நினைவுகூருவதாகத் தெரிவித்துள்ளார். மேலும், அனைத்து மக்களுக்கும் தனது மனமார்ந்த சுதந்திர தின வாழ்த்துகளையும் அவர் தெரிவித்தார்.இந்திய விடுதலைப் போராட்டத்தின் வரலாற்றில் தமிழ்நாடு தனிச்சிறப்பான இடத்தைப் பெற்றுள்ளதாகவும் அவர் குறிப்பிட்டுள்ளார். அந்நிய ஆட்சிக்கு எதிராக எழுந்த ஆரம்பக் குரல்களும், மக்களிடையே விடுதலை உணர்வை வளர்த்த வீரச் சிந்தனைகளும் தமிழ் மண்ணிலிருந்து வலிமை பெற்றதாக அவர் கூறியுள்ளார்.தேசப்பற்று மற்றும் தியாக உணர்வை மக்களிடம் விதைத்த சுதந்திரப் போராட்ட வீரர்கள் கனவு கண்ட இலக்குகளை நிறைவேற்றுவது அனைவரின் பொறுப்பு என்றும் அவர் வலியுறுத்தியுள்ளார்.நாட்டின் ஒற்றுமை, ஒருமைப்பாடு மற்றும் இறையாண்மையைப் பாதுகாத்து, அனைத்து மக்களுக்கும் சமமான நலன்களை உறுதி செய்யும் இந்தியாவை உருவாக்க வேண்டும் என்றும், சமத்துவம், சமூகநீதி மற்றும் ஜனநாயகக் கொள்கைகள் மேலும் வலுப்பெற இந்த சுதந்திர தினத்தில் அனைவரும் உறுதியேற்க வேண்டும் என்றும் தனது பதிவில் முதல்-அமைச்சர் விஜய் தெரிவித்துள்ளார்.